S’editore Càralu Delfino de Tàtari no at mai retzidu contributos dae sa Regione. E cando si narat mai no est unu modu de nàrrere. Si caligunu tenet dudas subra custu, andet e abbàidet in sos archìvios. Sende chi sas propostas de bona parte de sos àteros editores benin atzetadas luego, a s’editore Delfino sa Regione non si leat mancu s’istrobbu de dare una risposta cale si siat.
Comente mai e proite? Si podet dare chi siat ca isse non si faghet bider mai in Casteddu (non tenet simpatia pro sa tzitade: b’at una confusione manna, li piaghen pius Tàtari e sas biddas de cussa cussorza, in su mare de Casteddu isse non bi nadat), gasi chi in sa Regione no ischin mancu ite cara apat.
Ma nois dimis cherrer ischire custu: comente si detzidin sos contributos, cun cale critériu, si bi nd’at unu, o pro amistade ebbia chene abbaidare sas cumpeténtzias? Cale si siat su modu, assessores e dirigentes regionales, faghide su piaghere: dàdeli calchi cosa, nessi una tantum, s’iscuru!
