Sennoras, sennores
Bos imbio custa lìtera pro bos fàghere ischire chi semus a tretu de retzire dae oe sas adesiones a su progetu Bilinguismu creschet, ammaniadu dae sos ufìtzios nostros cun su servìtziu Bilingualism Matters de s’Universidade de Edimburgu.
S’istrategia chi semus sighende est pro como cussa de fàghere unu coordinamentu lèbiu e non formalizadu a manera giurìdica de una retza de entes locales, istitutziones, iscolas, assòtzios, setores universitàrios e àteros sugetos chi cherent partetzipare a sas initziativas. Cun custa modalidade cherimus promòvere sa possibilidade, pro chie est interessadu, de organizzare o partetzipare a iniziativas de informatzione e formatzione cun sa professora Antonella Sorace de cuncordare cun issa pro s’annu chi benit.
Est òviu chi, pro otènnere sa collaborazione in su territòriu sardu, de sa responsabile de Bilingualism Matters, est pretzisu a cuberare resursas econòmicas, finas minores, chi posca ant a andare in parte a pagare sos gastos de sa presèntzia in Sardigna de sa prof. Sorace, e in parte comente contributu volontàriu a su tzentru de chirca Bilingualism Matters in Edimburgu.
Sa Regione, pro contu suo, at giai postu a disponimentu una summa pro s’inghitzu de su progetu e, in intro de ocannu, at a pònnere àteras resursas importantes tràmite sos ufìtzios linguìsticos de sa Sardigna pro organizzare initziativas comente cussa acumprida de reghente in Casteddu finas in àteros comunes, iscolas, istruturas sanitàrias, universidades, babbos e mammas organizados e àteros logos. Sa tarea est cussa de isparghinare a sa popolazione sarda sos ischires chi pertocant sos vantàgios de su bilinguismu in sos pipios piticos. Sa formatzione l’at a fàghere, comente in Casteddu, a manera desemplada, Antonella Sorace, catedràtica de Linguistica Acquisizionale, in s’ateneu iscotzesu.
Sende chi pro como su Servìtziu Limba Sarda de sa Regione Autònoma est coordinadore de su progetu, in s’isetu chi àteros potzant leare s’incàrrigu e fàghere crèschere custa istruttura “licuida”, bos prego de imbiare a s’indiritzu meu postel (mail) sa disponibilidade a collire resursas o a ospitare iniziativas pro s’annu chi benit.
A nos bìdere sanos
Dr. Giosepe Corongiu
Servìtziu Limba e Cultura Sarda
