FAVATAOe presentamos unu de sos pratos prus saborios de sa traditzione nostra. Andat bene ca totus sos màndigos sardos sun bonos e genuinos, ma in custu periodu, de fritu meda, sas massaias sardas si aprestan a fàere sa fae cun lardu, o fae a landinu.

 

Bisonzat prima de totu de bos ringratiare po àere contribbuiu cun sas retzetas bostras, mentovande sos màndigos de mamas e iaias, a faere connòschere sas prendas cuadas de sa traditzione. Custa retzeta mi dd’at iscoviada un’amiga cara: Ornella Ibba, de Ardaule: a issa si dd’at lassada sa iaia Bonacatta.

 

Sa particularidade de custu pratu suni sos ingredientes, unu pagu inusuales. Iat èssere ca certas cosas, oe guasi non s’atzapant prus, comente una calidade de pirighedda chi creschet in sos sartos de Santu Chirigu, pitica e ruja, sas castanzas e su porru areste… Ma como bidimos comente fàere sa fae de Iaia Bonacatta.

 

 

Sos ingredientes

 

– fae

– petza lardu de procu

– porru areste

– castanzas

– pirighedda

– ozu ’ermanu

 

 

Preparatzione

 

In-d-una casserola si ponet a sofrìere sa fae, chi amos postu a ammoddigare su sero prima, impari cun sa petza e su lardu. Una ’orta sufrìssia si azunghet abba e unu pagu ’e sale e si faet còghere a su mancus un’ora. Passau custu tantu s’azunghent sos atros ingredientes: sas castanzas ispuligadas, sa pira e su porru totu a cantigheddos. S’acabbat de còere fintzas a cando sos ingredientes non suni totus isfatos e s’abba si est assorbida. Cun custa retzeta si consizat de bufare una bona tassa de Cannonau a sa salude. Auguramos bon’apetitu.

 

 

Si tenes calecuna retzeta chi cheres bìere pubblicada mandadda a: [email protected]