Prima fit catolaju e cantadore,
in sas garas totue at triunfadu;
poi a padre si che fit andadu
e diventadu fit preigadore.
E poi, cun s’ingàrrigu ’e Priore,
l’aian unu cunventu assignadu,
e pro su tempus ch’inie est restadu,
a Deus at servidu cun fervore.
Però, mancari padre frantziscanu,
sas fritzas de s’amore l’an colpidu,
ca s’est de una bella innamoradu.
A pena s’est de s’àbbidu ispozadu,
s’abilitatzione at cunsighidu
a professore de italianu.
Catolaju, cantante, padre ’e missa,
poi docente e a letu cun issa.
