Cenarba su Casteddu si dd’at giogada cun su Napoli e at perdiu e de tres partidas s’agatat sempiri a trinta puntus in classifica. Indenanti de is piciocus de Fàbiu Pisacane si ddue agatant Torino e Genoa cun trintatres puntus e su Parma a trintacuatru. Invecias in palas teneus sa Fiorentina a bintinoi, sa Cremonese e su Lecce a bintiseti e, infinis, su Verona cun su Pisa a dixiotu. Po immoi, parit ca custas urtimas duas funt postas mali e feti unu meraculu dd’as podit sarvai de sa serie B. E chini at essi a si giogai s’urtimu postu po nci calai? Non podint abarrai trancuillus su Parma, su Genoa, su Torinu e massimamenti su Casteddu, sa Fiorentina, sa Cremonese e su Lecce. Po s’ora ant essi is pugliesus e is lombardus a si giogai s’urtimu postu po nc’acumpangiai Verona e Pisa. Ma, est totu ancora de giogai, ca is puntus a disponimentu funt binticuatru.
Su Casteddu at a tenni un’ocasioni manna s’undixi de arbili, candu in Sardigna ant a lompiri sa Cremonese de Màrcu Giampaolo, chi at pigau su postu de Davidi Nicola in sa partida binta s’atra dì cun su Parma. Est propriu sa vitoria de is lombardus chi at post uin arriolu totu is scuadras chi si dda funt gherrendu. Is lombardus, in sa giorronnada acabbada eriseru, funt is solus a airi bintu, in su mentris chi totu is atras scuadras ant perdiu. Feti sa Fiorentina de Pàulu Vanoli ce dd’at fata a si pigai unu puntu contras de s’Inter.
Dominigu chi benit su campionau si frimat, ca s’Italia de Gattuso tenit de giogai po andai a is Mondialis de fubalu. S’at a torrai a giogai in su fini de cida de Pasca Manna, cun su Casteddu chi at a lompiri in Sassuolo, chi s’agatat in dd’una positzioni de classifica de averas trancuilla cun trintanoi puntus fatus. Sa Cremonese tenit su Bologna, su Lecce s’Atalanta e su Genoa si dd’at a giogai cun sa Juventus. In su mentirs chi invecias Fiorentina e Torino tenint s’ocasioni manna de c’aciuvai ancora de prus su Verona e su Pisa.
Foto: https://www.youtube.com/watch?v=G4VzjSJAxwI
