Non feti Florinel Coman cun Zito Luvumbo: finas Grabieli Zappa no at a giogia sa partida de pusti cras, a is cuatru de pusti prangiu, in s’Olimpico contras sa Roma de Claudiu Ranieri. Su giogadori de difesa de su Casteddu, a pustis chi de su trabbagliu in su Crai Sport Center de Assemini teniat problemas, at fatu is esaminis e ant agatau calencuna cosa chi no andaiat. Ancora non si connoscit po cantu tempus at a abarrai in foras, ma de seguru no at essi in campu dominigu a si giogai sa partida cun is grogus-orrubius. Is dotoris de su Casteddu ant a cicai de ddu torrai a ponni a postu po sa partida chi s’at a giogai a pustis chi su campionau s’at a frimai po sa Natzionali italiana, candu in sa Domus Unipol at a lompiri su Monza, chi est s’urtimu de sa Serie A. Partida chi s’at a giogai a mesudì e mesu su trinta de custu mesi.
Po Zappa at essi finas sa partida de unu aunia no at a giogai, poita po s’ora at gioagu 28 partidas intru de 28 in campionau e tres in pissu de tres in sa Coppa Italia. Finas a oi at sartau sa parti de dus de sa partida contras de su Lecce de su 31 de austu, s’urtimu cuartu de ora cun sa Latzio de su 3 de frairgiu passau e is urtimus binti minutus de sa partida cun sa Juventus in Coppa Italia de su 17 de mesi de idas.
Po mori de s’infortuniu de Zappa, s’allenadori Davidi Nicola s’agatat custrintu a cicai calencunu chi ndi possat pigai su postu. At essi facili a biri Nadir Zortea, chi s’at a abbasciai in cussa parti de campu.
Ma, bistu ca finas Coman e Luvumbo no ant a a giogai su problema de su Casteddu at essi de agatai giogadoris chi possant giogai in is partis de manca e dereta de su campu.
Chi Nicola umperat su 4-2-3-1 de dominigu passau podit fairi giogai Matia Felici in sa parti dereta, Augello in sa parti de manca e Obert passat a palas in sa difesa.
Màuru Mura
Cenarba, su catodixi de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.fantacalcio.it/news/calcio-italia/13_03_2025/cagliari-nuovo-problema-per-nicola-si-ferma-anche-zappa-474727
