“No est ancora acabbada, nos abbisongiat a pigai is puntus chi ancora mancanta”. Ddu narat Davidi Nicola, ma po su Casteddu a si sarvai bastat pagu: immoi funt otu is puntus in prus de Venetzia e Empoli, cun feti cuatru partidas de giogai. “Oi eus giumpau su Verona e stesiau galu de prus su Venetzia cun s’Empoli. Custus tres puntus funt de importu mannu. Soi spantau de sa gana e sa calidadi chi at postu in campu Pavoletti ca, finas a candu est abarrau, at donau totu”, is fueddus de s’allenadori piemontesu a pustis su 0-2 de sa partida de eris a merì cun su Verona. “Teneus giogadoris giovunus de interessu, ma finas giogadoris prus becius de pigai comenti de esempiu. Custu meri soi allirgu meda po Pavoletti aici comenti po Deiola chi at tentu calencunu problema et est imbucau beni meda. Soi allirgu po totu is piciocus ca scint cantu contant custus tres puntus”.
Po Nicola, eris a merì, s’est amostada una particolaridadi, intru de atras meda, chi dd’agradat meda: “S’atentzioni manna chi eus postu in campu. Custu est cussu chi m’agradat de prus ca ddue fustis trabbagliendu meda, po mori ca in custu eus faddiu prus de una bia. Non in sa gana de fairi giogu, in donnia lassiaus calencuna cosa. Is piciocus oi ant donau crobba manna a sa calidadi e ant segnau in s’ora giusta. Depeus cicai de torrai a fairi partidas comenti de custa, a bias faddeus ma connosciaus sa fortza de su Verona. Bravus meda is piciocus, soi allirgu massimamenti po issus ca est de un’annu chi trabbagliant”.
A s’acabbu de sa partida a Nicola benit amostada s’imagini de unu pipiu, tifosu de su Casteddu, chi prangit candu at segnau Pavoletti: “Est su annu de unu chi soi innoi, ma bos asseguru ca is tifosus funt spantosus. Su tifosu de su Casteddu non ti lassat mai a sa sola e t’acumpangiat sempiri. Custu est su fubalu chi pragit a mimi”.
Màuru Mura
Martis, su bintinoi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=ZiNRGu-ZHzU
