Su “a pustis Saccargia” est giai cumentzau. E is associus spainaus in totu sa Sardigna coidendu s’ant a torrai a atobiai po decidiri comenti ndi pesai is morrungius. Su caminu chi si bolit fairi est su matessi de Pratobello: sabudu ddu naraiat e ddu torraiat a nau, cun totu s’orgogliu barbaricinu, a is peis de sa Basilica de sa Santissima Trinidadi, chini, comenti de Francisca Succu, otantacinc’annus de Orgosolo, indenanti a sa prepotentzia de su Stadu, in sa matessi Pratobello at scritu sa storia. “E non feti Pratobello, dapoi ce dda eus fata finas a mudai is paperis de su Parcu de su Gennargentu, fendu ponni a un’ala unu progetu chi non pragiat po nudda aa tosu sa genti de su logu”, at contau tzia Francisca. “Ce dda eus a fairi a frimai cust’atru disacatu”, at sighiu a nai.
Sa ghia regionali de is associus coidendu s’at a torrai a atobiai, po cumprendiri comenti est posta sa chistioni e po decidiri comenti si moviri in su benienti. Est cuasi seguru ca un’atra manifestada possat essiri aprontada a intru de s’acabbu de su mesi de cabidanni: “Mancari in dd’unu logu simbulu de sa Sardigna comenti de sa Basilica de Saccargia”, narat Luisu Pisci, portabogi de is associus contras de s’eolicu. “Una pensada podit essiri cussa de Barumini o finas atrus logus aunia si possat lompiri chena problemas e aunia is aministratzionis de is biddas possant donai un’agiudu”.
Immoi, a dogna manera, s’at a tenni atentzioni a su Consigliu Regionali chi martis chi benit, su binticincu, depit aprovai sa regula in pissu de sa proroga giai decidia de sa presidenti de sa Regioni Alissandra Todde.
Is associus si chesciant ca ancora abarrant in peis totu is prus de otuxentu preguntas presentadas intru de fotovoltaicu, eolicu in terra e in mari po una potentzia, totu paris, de 58 Gw. Sa lastima est ca in pissu de is progetus giai cumandaus non si possat fairi nudda, chi non cicai una relata cun su Guvernu po ddus castiai a unu a unu.
Màuru Mura
Martis, su dixiotu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.okmugello.it/articolo/vicchio-giornata-di-protesta-contro-leolico-nel-mugello_68369
