Custu merì, a is noioras mancu unu cuartu, in Casteddu erribat s’Empoli. Partida de importu mannu po is sardus, massimamenti po cicai de binciri sa primu partida de custu campionau. Po imoi funt dus is puntus aciapaus: unu cun Semplici cun su Spezia e s’atru, cussu de cominigu passau, cun Mazzarri in Roma cun sa Lazio.
Sa scuadra Toscana no est chi siat posta meda meglius de is piciocus de Mazzarri: po imoi tenint tres puntus, gratzias a sa vitoria de spantu cun sa Juventus de Allegri in Torinu. Tres funt is partidas perdias, cun sa Lazio, su Venezia e dominigu passau cun sa Sampdoria, de is piciocus de Andreazzoli, chi est giai cumentzendu a biri calencuna pantuma. Si chistionat giai de ce ddu bogai de mesu, ca is cosas non funt andendu comenti depint.
Torrant dus giogadoris de importu mannu po Mazzarri: Godin e Strootman. Ma de cussu chi si cumprendit non ant a partiri de su cumentzu de sa partida.
S’allenadori de su Casteddu iat depri torrai a fairi giogai is matessis ominis chi ant cumentzau sa partida in Roma: is dudas funt feti cussas de chini fairi giogai intru de Deiola e Strootman in centrucampu e intru de Caceres e Walukiewicz a palas. Parit chi su sardu e s’uruguaianu siant is favoressius, a dogna manera.
Mazzarri non podit contai intru de Faragò, Ceter, Ladinetti, Rog e Zappa, cust’urtimu scualificau po una partida.
Custus funt is giogadoris chi iant depiri cumentzai po su Casteddu: Cragno; Caceres, Ceppitelli, Carboni, Lykogiannis; Nandez, Deiola, Marin, Dalbert; Joao Pedro, Keita.
E, invecias, custus po s’Empoli: Vicario; Stojanovic, Ismajli, Luperto, Parisi; Ricci, Stulac, Bandinelli; Bajrami, Di Francesco; Pinamonti.
Su campionau est ancora longu, ma iat essi meglius a cumentzai a binciri giai de imoi, po non s’agatai, a pustis, a tenni su sulidu curtzu po ndi sighiri atras scuadras.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://calciodangolo.com/2021/09/cagliari-empoli-5-giornata/
