A pustis su spantu de sa dì de unu, candu est cumentzau cun Alessio Boni, sighit su Barumini Music & Heritage Festival, cenarba chi benit 25 de mesi de orgiolas a is noi de merì, cun sa violinista Anan Tifu. Est, massimamenti, unu merì de non perdiri, po su progetu postu in peis de sa Fundatzioni Barumini Filera Cultura e de su Sotziu Enti de su Logu po is Atividadis Culturalis e de Spetaculu, cun s’agiudu de sa Diretzioni Regionali Musei Sardigna e de sa Fundatzioni Tiatru Liricu de Casteddu.
Unu festival chi ponit paris istitutzionis, cultura e logu, contendu s’eredidadi millenaria de sa Sardigna in dd’una lugi noa, intru de passau e presenti, cun amostus artisticus de calidadi manna giai po is turistas medas chi s’agatat in custu mesi in sa terra nosta e giai po sa genti de su logu chi est sempiri atenta meda.
Est, duncas, Anna Tifu, spantu mannu cun su violinu intru de is manus e una intru de is musicistas prus apretziadas de sa generatzioni sua, a s’amostai in pissu de palcu, in sa dì de pusti cras. Acumpangiada de su pianista Romeu Scaccia, Anna Tifu – chi at cumentzau a studiai a feti ses annus de idadi e chi in su 2007 at bintu su primu premiu de s’atobiu internztzionali intregau a George Enescu de Bucarest – at a fairi connosiri, cun su violinu is tangus de Astor Piazzolla finas a lompiri a is musicas de su biau Etziu Bosso.
“Airi tentu s’oportunidadi de connosciri a Etziu Bosso est una de is cosas prus bellas chi mi siant sussedias. S’amori, is fueddus e sa gratzia de Etziu m’ant acumpangiai in su caminu umanu e artisticu po sempriri”, at nau sa violinista.
Unu acapiu fundudu intru de is dus chi, a pustis cinc’annus de sa morti de su musicista, dda acrarit comenti una de is testimoniantzias artisticas prus intendias. Su diretori artisticu de su Festival est su Maistu Màuru Meli.
Màuru Mura
Mercuris su bintitres de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.facebook.com/photo/?fbid=122108499524908720&set=a.122108499656908720
