Su acabbai de sparai in Gaza est, giai fut ora, beridadi. A innantis s’annuntziu est lompiu de unu funtzionariu de sa Domu Arva, dapoi cussu de su presidenti Donald Trump e a pustis is fueddus de dogna parti interessada.
De cantu si connoscit non s’at a sparai de dominigu, in segus de prus de 460 dis de bataglias, cun dd’una parti de unu chi at a addurai po ses cidas, intru de is calis at a cumentzai sa liberatzioni de is ostagius.
Scipia sa nova in migliaias de personis in totu Gaza e in Israele funt caladas in is caminus po festai s’acordiu, in su mentris chi su presidenti de is Stadus Unidus si donaiat miniscimentus: “Custu acordiu spantosu, de acabbai is bataglias, s’est tentu dapoi de sa vitoria nosta in su mesi de Sant’Andria, poita at donau signali a totu su munu ca s’aministratzioni mia iat airi cicau sa pagi po donai seguresa a totu is americanus e a is amigus de s’America”, at scritu Trump in su social Truth, coidendu a innantis de totus po fairi sciri sa nova. “Eus tentu aici meda chena mancu nos agatai in sa Domu Arva. Pensai a totu is cosas mannas chi ant a sussediri candu apa a torrai e s’aministratzioni mia at essiri cunfirmada, aici de podiri garantiri atras vitorias mannas po is Stadus unidus”, at aciuntu.
Su presidenti bessiu, Joe Biden, at, invecias, fueddau de custu acabbu comenti de s’arresurtau de “mesis e mesis de diplomatzia”, fendu cumprendiri ca s’acordiu lompit de s’aministratzioni sua chi at ghiau in is annus passaus.
“Custa est una nova manna et est su cumentzu de s’acabbu de custa guerra”, funt is fueddus de s’ambasciadori de Israele in sa UE, Haim Regev, chi at spiegau ca “is primus ostagius ant a torrai a domu a s’acabbu de custa cida”.
Po cantu pertocat Hamas chi, a dogna manera, at cunfirmau su lompimentu a s’acordiu, at nau ca “totu su miniscimentu est po sa barra de is palestinesus”.
Màuru Mura
Giobia, su seixi de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ilfattoquotidiano.it/2025/01/15/israele-e-hamas-hanno-accettato-laccordo-per-il-cessate-il-fuoco-a-gaza-trump-conferma-gli-ostaggi-saranno-rilasciati-tra-poco/7838577/
