Ant torrau a oberri s’indagu in pissu de su bocidorgiu de Fausto e Iaio, is dus piciocus bocius su dixiotu de martzu de su 1978 acanta a su centru sociali Leoncavallo, in Milanu. Ddu at decidiu sa “gip” Maria Idria Gurgo de Castelmenaedo, pighendu po bona sa pregunta de is publicus ministerus Lionardu Lesti e Francisca Crupi.
Su indagu chi sa gip at torrau a oberri ddu iat postu in archiviu sa “gip” Clementina Forleo, sa cali iat nau ca si ddue agataiant “elementus de significu” a “carrigu de sa destra prus tostada e massimamenti de is indagaus” Massimu Carminati, Claudiu Bracci e Mariu Corsi. Est a nai finas ca is inditzius agataus tandu non funt mudaus in provas. Un’atru paperi, sempiri in pissu de su bocidorgiu de Fausto e Iaio, ddu iant obertu prus de un’annu a immoi, sighendu sa pregunta de su sindigu de Milanu, Giusepu Sala, a su procuradori Marcellu Viola.
Tandu is publicus ministerus Lesti e Crupi iant pediu a s’uficiu aunia s’allogant is repertus, chi s’agatat in su Palatzu de sa Giustitzia in Milanu, de fairi cicas po connosciri cali siant is cosas allogadas po fairi atrus esaminis meda prus modernus. In su logu aunia ant bociu is dus piciocus, iant agatau unu capeddu de lana de colori asulu chi, a dogna contu, no ant mai cumpudau beni e chi, in segus, no est mai prus stetiu torrau a agatai. In sa filera de una informativa noa de sa Digos, est stetia torrada a oberri s’inchiesta becia.
In su centru de su torrai a oberri s’indagu s’agatat una peritzia dattilografica de su paperi aunia si naraiat de ddus airi bocius. A cantu si connoscit, iant essi bessius a pigliu caminus nous, sempiri a carrigu de sa destra prus tostada, chi ant cunvintu sa “gip” Maria Idria Gurgo de Castelmenardo a torrai a oberri s’indagu nou, in su mentris chi s’indagu beciu, po sa pregunta de is pm Lionardu Lesti e Francisca Cruspi, ddu iant archiviau in su 2000.
Màuru Mura
Lunis, su cincu de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.open.online/2025/05/06/milano-gip-riapre-indagini-omicidio-fausto-iaio/
