S’est a torrau a oberri, indenanti de sa Corti de Assise de Casteddu, su processu a carrigu de Igor Sollai, s’autista de corantatres annus, incurpau de airi bociu sa pobidda Francisca Deidda, de corantadus annus, a corpus de marteddu a conca in sa domu aunia biviant in Santu Sparau. Totu est sussediu in su mesi de maju de ocannu passau e Sollai est finas incurpau de airi atacau su corpus de sa pobidda chi, in segus, ddu iant torrau a agatai in is orus de unu ponti beciu romanu, acanta de su caminu de sa 125, in su sartu de Santu Idu.

Su publicu ministeru Marcu Cocco at cumentzau a chistionai cichendu de ponni paris totu is orrugus de custu contu chi est imbucau in su coru e in conca de genti meda. At trabbagliau meda su publicu ministeru Cocco e difatis candu at pigau su fueddu at cicau de arregodai dogna cosa sussedia in cussas oras. Massimamenti at castiau a sa vida de sa picioca bocia de su pobiddu e no at lassau a un’ala nemancu s’indagu chi at fatu lompiri a s’acapiamentu de Igor Sollai. “Is paperis de su processu si prenint giai de cincumila paginas”, at cumentzau Marcu Cocco, “ma sa storia chi custu processu contat est unu contu facili de averas de pensai. Su contu de sa vida e de sa morti de Francisca de dda eus fata a dda torrai a fraigai. E tocat a nai ca su pobiddu, Igor Solai, at provau a nosi ponni unu baculu intru de is orrodas”.

Est finas a nai ca su publicu ministeru at a podiri chistionai po tempus meda e, una bia chi at acabbau issu, su fueddu at a passai a sa filera civili e a is abogaus chi Sollai at cicau po si difendiri: Carrulu Demuru cun Laura Pirarba.

Sa giustissia incurpat a Sollai giai de su bocidorgiu de Francisca, ma non feti. Difatis atras curpas funt: sa morti de sa pobidda, arregionis chi spantant, airi pensau a innantis de bociri e crudelidadi. Po curpas aici at essi facili chi su pm pedat su presoni po totu vida.

 

 

 

 

 

Màuru Mura

 

 

 

Martis, su ses de maju de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.procura.ca.it/