Si frimat a tres partidas sa filera de puntus boddius de su Casteddu, chi oi at perdiu po 2-0 in domu de su Torinu de Vanoli chi iat bintu feti duas bortas in is urtimus cuatru mesis. Is piciocus de Nicola non funt propriu calaus in campu ca non ant imbrutau is manus a su portieri Milincovic Savic mancu una bia. A decidiri sa partida dus gol de Che Adams. Su miniscimentu de is giogadoris de su Torinu est chena de farta, difatis Caprile at sarvau prus bortas sa porta casteddaia cun paradas spantosas. E, po nai sempiri de su miniscimentu, a innantis su matessi Adams e a pustis Karamoh nd’ant boddiu is palus de sa porta de su Casteddu.
A s’acabbu s’allenadori Nicola at chistionau cun is giornalistas: “Oi fustis stracus de averas, podit sussediri ca beniaus de partidas tostadas aunia iaus donau dogna stiddiu de sudori”. Nicola at cambiau cuatru giogadoris totu paris, ma a s’imbessi de sa partida cun su Lecce non funt serbius a nudda: “Immoi no est chi teneus giogadoris medas de fairi giogai. Arremonu ca Luvumbo no est cun nosu de unu pagu de tempus e Felici cun Zortea, Zappa e atrus funt gioghendu meda de averas chena si podiri pasai. E, dapoi, tocat finas de donai su miniscimentu a su Torinu chi at giogau beni meda gherrendusinda in dogna bocia”.
Nicola, a pustis, aciungit: “Sciu ca is giogadoris mius ant donau totu in campu, ma sciu finas ca is fortzas in corpus funt pagas. A intru de unu campionau aici longu e dificili partidas aici podint sussediri. Non ce dda eus fata a torrai a partiri comenti scieus fairi, ma immoi tocat a ponni sa conca a sa partida benienti. Ddu torru a nai: su Torinu oi teniat prus gana de nosu”. Chi, a dogna manera, at essi intru de dexi dis candu a s’Unipol Domus at a lompiri sa Latzio de Baroni. Partida dificili meda, ma in domu su Casteddu at spantau sempiri.
Màuru Mura
Cenarba, su binticuatru de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=LW__hghX-0s
