Unu terremotu de magnitudo 7.7 at boddiu sa Birmania, cun su centru a seixi chilometrus in pissu de Saigang, in su coru de su Stadu birmanu. Fait connosciri su disacatu s’istitutu geosismicu statunitensu Usgs. Po immoi is mortus segurus funt binticincu, ma si timit ca su numuru possat cresciri de meda.
Su movimentu de sa terra s’est intendiu finas in Thailandia: in Bangkok est orrutu unu gratacielu in fraigamentu, de trinta pianus, e sonumancu corantatres trabbagliadoris chi si ddue agataiant non s’agatant prus e funt a suta de sa scrava. Su sisma ddu ant intendiu finas in sa provincia sud-ocidentali cinesa de su Yunnan.
Sa scossa – po cussu chi narant is numurus – at tentu una magnitudo trexentus bias in prus de cussa de su terremotu de Amatrice de su 2016 e otu bortas in prus de cussa mai connota in is contus italianus, est a nai cussa cun sa magnitudo lompia a 7.1 in su 1908 in Messina. “Non s’agat s’erriscu de su tsunami poita su centu de su terremotu est a prus o mancu trexentus chilometrus de sa costa – at nau Sarbadori Stramondo, dirigenti de cica de s’Istitutu Natzionali de Geofisica e Vulcanologia – ma candu scossas de custa mannaria funt in is montis ddu at sa possibilidadi de franas”.
S’Unioni Sarda fait connosciri sa testimonia de unu pirresu chi s’agatat de tempus meda in Bangkok: “A su cumentzu fut unu tremiri chi mancu s’intendiat. Apu, difatis, pensau ca podiat essiri sa metropolitana chi passat a suta de domu mia. Ma in tempus pagu totu s’est mudau e apu timiu meda”. Franciscu Lenza, su pirresu de corantases annus chi bivit in Bangkok, at biviu a sa sola totu su contu de su terremotu: “Fui in su comudu e cun sa sposa mia seus fuius candu eus cumprendiu ca fut unu terremotu. In su caminu si ddue agataiat genti meda, finas custa fuia de domu insoru. Apu timiu ma totu est andau beni”.
Màuru Mura
Giobia, su bintiseti de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.corriere.it/cronache/diretta-live/25_marzo_28/myanmar-terremoto-magnitudo-7-7-le-ultime-notizie-in-diretta-numerose-vittime-e-gravi-danni-a-mandalay.shtml
