Su Casteddu saludat a Nicolas Viola. Su giogadori calabresu, de mesu campu, fut lompiu in Sardigna in su mesi de orgiolas de su 2022 e immoi, a pustis tres annus lassat po mori ca non fait parti de su progetu nou, cussu de ocannu chi benit po su campionau de su 2025-26, de Fabiu Pisacane chi, de una bona pariga de dis, est s’alleandori nou de sa scuadra casteddaia.

Viola serrat sa filera in Casteddu cun setantaseti presentzias e undixi gol. Est de nai, finas, ca po dexi bias at donau sa bocia po segnai a is cumpangius e mai at pigau unu cartellinu orrubiu. In prus de totu custu, s’agiudu de Viola a su Casteddu est finas in cussu chi contaiat po is cumpangius prus giovunus e finas po sa relata chi at tentu cun dogna allenadori agatau.

Ocannu passau iat allonghiau, cun sa sociedadi de su presidenti Tomasu Giulinu, po giogai un’atru, massimamenti poita in Casteddu si ddue agataiat beni meda. In su campionau serrau su 23 de maju passau, Nicolas Viola at giogau po bintiseti bias e at fatu tres gol. Abarrant, intru de is arregodus prus bellus po is tifosus, su gol in Milanu in su paregiu contras de s’Inter e, lastima manna, ca in cussa partida podiat fairi, a s’acabbu, finas su gol po binciri. Ma, galu de prus, abarrat s’arregodu de unu giogadori chi est, a innantis, un’omini balenti. Po ddu fairi cumprendiri est a nai ca, intru de totu is scuadras (Regina, Palermu, Ternana, Novara, Benevento e Bologna) aunia at giogau, Viola at tentu finas su tempus po si laureai in Psicologia. No est pagu po unu giogadori de palloni. Viola est nasciu in Oppido Mamertina, in Calabria, su 12 de Santu Aine de su 1989 e duncas at a lompiri intru de pagu is trintases annus, ma forsis podiat ancora agiudai is giovunus de sa truma. A dogna manera aici est andada.

In su fratempus su Casteddu aspetat su diretori sportivu chi, po immoi, pargiat essiri Guidu Angelozzi chi at trabbagliau po su Frosinone in is annus passaus.

 

 

 

 

 

Màuru Mura

 

 

 

Martis, su dixiaseti de làmpadas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://it.wikipedia.org/wiki/Nicolas_Viola