Su Bologna prenit sa filera e, a pusti essiri lompiu in finali, bincendudeddas, atras duas bias, in su 1970 e in su 1974, bincit sa Coppa Italia de tres in sa storia sua. A decidiri sa finali, giogada che sempiri in s’Olimpico de Roma, unu gol de Dan Ndoye in su cumentzu de sa parti de dus de sa partida. Po su Milan, aici, sa Coppa, sighit a abarrai vietada, difatis is orrubius-nieddus non dda bincint de su 2003.

Fut unu noti chi is bolognesus aspetaiant de meda, est a nai de prus de cincuantun’annus. Ca fut su 1974 candu, po sa bia de duas, su Bologna at artziau po sa borta de dus sa Coppa Italia. Eris at torrau a binciri in sa Coppa prus de importu in Italia. Ddu fait torrendu gratzias a s’1-0 contras de su Milan ca est bastau su gol de Dan Ndoye, bravu a si poderai in s’area de rigori sa bòcia e a tirai a suta de s’ingrugiu de is palus, aunia Mike Maignan, su portieri milanista, non podiat erribai. Est feti custa sa giogada chi balit sa Coppa Italia 2024-25. Una partida chi, massimamenti in su primu cuartu de ora, at amostau su meglius cun is dus portieris, Skorupski e Maignan, bravus meda a si fairi agatai prontus. Dapoi su Bologna at contrallau beni sa partida e su Milan at cicau de serrai totu is spatzius po cicai de atacai, coidendu, cun Rafael Leao. Ma, a foras de una pariga de erriscus portaus de su portoghesu, sa scuadra de Conceicao at fatu pagu de averas. Su Bologna s’est fatu agatai prontu in su gol de Ndoye e, dapoi, su Milan no est chi apat fatu meda. Difatis su portieri bolognesu no at erriscau prus de tantis e aici at aspetau is tres sulidus de s’arbitru po cumentzai sa festa.

Custus is ominis postus in campu de s’allenadori Italiano chi, a pustis tres finalis de sighiu perdias, bincit sa de cuatru: Skorupski Holm (76′ Calabria), Beukema, Lucumí, Miranda; Ferguson, Freuler; Orsolini (68′ Casale), Fabbian (68′ Pobega), Ndoye (81′ Odgaard); Castro (81′ Dallinga).

 

 

 

 

 

Màuru Mura

 

 

 

Giobia, su cuindixi de maju de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.eurosport.it/calcio/coppa-italia/2024-2025/il-bologna-vince-la-coppa-italia-dopo-51-anni-milan-sconfitto-1-0-in-finale-la-decide-ndoye_sto23182664/story.shtml