Sarbadori Sinagra istat meglius meda, custa est sa nova bona lompia de su spidali. Arregodaus ca su piciocu sicilianu, chi at lompiu is trint’annus de idadi, s’agataiat in coma de dixiotu dis po mori de cropus meda pigaus in Lanzarote, in is isulas Canarias. Su giovunu abarrat ancora po tempus in su matessi aposentu de terapia intensiva, ma at sighiri a biviri: “Po mori ca si nd’est scidau a nosu donat bellas speras”, faint sciri is dotoris. Chi Sarbadori est sarvu chini ddu at scutu, e in cuss’ora fut drogau de cocaina, est invecias in dd’una cella de su presoni.
“Unu pagu de lugi a s’acabbu de sa galleria! Sarbadori nostu est torrendu intru de nosu: fut ora”, ant scritu in Instagram Vitu e Andria Sinagra, chi funt su babbu e su fradi de su piciocu.
“Est totu unu paris de oras chi parit cumprendat totu e in parti, invecias, ddi pigat su sonnu. Fueddat e cicat de si moviri. No est, tocat a ddu nai, cuscenti ma arrespundit beni e, finas chi at abarrai in sa terapia intensiva, teneus fidi manna”, sighit su scritu de Vitu e Andria. In su matessi scritu, sa familia de Sinagra, chi tenit arreiginis de Favignana, torrat gratzias meda a totu s’isula po s’agiudu e is fueddus durcis, a pustis de s’imbucamentu in su spidali e aici si torrat gratziasa finas a is autoridadis italianas e a totu sa genti chi trabbagliat in su spidali Doctor Negrin de is Gran Canarie aunia Sarbadori est ricoverau. “Genti chi balit meda, professionalis de averas e sempiri a disponimentu nostra po calechisiat cosa”, narant.
Est a nai ca finas chi su piciocu est beni postu, is dotoris ddu ant a castiai de prus a fundu, finas poita is cropus chi at pigau podint airi lassau calencunu disacatu po sempiri.
Candu Sarbadori at obertu is ogus ddue funt totu is parentis, de su babbu a su fradi e a sa sorresta, Is primus fueddus: “Eita ci feis innoi?”, faint cumprendiri ca fut a su scuriu de cantu sussediu e de custas urtimas dixiotu dis.
Màuru Mura
Cenarba, su catodixi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.lastampa.it/cronaca/2025/02/02/news/salvatore_sinagra_fermato_aggressore_lanzarote-14978352/
