Candu s’arbitru, Mateu Marchetti, at acabbau sa partida is giogadoris de su Casteddu ant festau po su puntu pigau in Bergamo contras de s’Atalanata. Unu puntu chi giuat e donat spera po su sighiu de su campionau: “Eus festau aici poita cumprendeus eita cheret narrer giogai contras de una scuadra forti comenti de s’Atalanta”, narat, allirgu meda, Matia Felici.
A pustis airi bintu cun su Parma dominigu passau, sa scuadra de Davidi Nicola at giogau un’atra bella partida contras de una de is scuadras prus fortis de su campionau. Po Felici, su 0-0 de Bergamo est figliu de su trabbagliu chi si faiti a intru de sa cida: “Intru de sa cida passada eus preparau beni sa pardida e oi in campu eus postu cantu preparau”.
Felici est abarrau in campu po prus de un’ora e a pustis est imbucau Florinel Coman: “Soi cuntentu. Sciu finas ca no apu fatu ancora nudda e depu sighiri a trabbagliai comenti soi fendu”.
Unu bolidu a su minuntu de noranta, po negai a s’Atalanta su gol de sa vitoria e po torrai in Sardigna cun dd’unu puntu. Elia Caprile at fatu una parada de spantu in pissu de Vanja Vlahovic. “”Unu pagu de bonasorti, poita sa bòcia fut girendu in dd’una manera strana: sa spera fut chi besssessit a foras e po bona sorti est andada beni”, is fueddus de su portieri de su Casteddu a s’acabbu de sa partida. “Custu est unu puntu de importu massimamenti poita ddu eus fatu contras de una scuadra chi giogat sempiri po binciri, giai in campionau aici de comenti in Champions League”.
Castiendu su caminu po si sarvai, custu paregiu est un’arresurtau chi balit meda po su Casteddu. “In prus de su puntu torraus in Sardigna fians cun dd’una partida giogada beni”, sighit su portieri casteddaiu.
De prus de unu mesi e mesu, Caprile no est prus setziu a castiai is partidas, comenti sussediat in Napoli e oi est un’atra bia protagonista in Serie A che ocannu passau cun s’Empoli, cun su matessi Davidi Nicola allenadori: “Su Casteddu m’at arregalau sa possibilidadi de benni a giogai. Sciu ca Nicola mi boliat meda. Deu cicu de trabbagliai e de mi fairi agatai sempiri prontu”.
Màuru Mura
Dominigu, su cuindixi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=THfHu6dH09A
