Mosca non tenit peruna pressi de cumpartziri sa pensada de si frimai cun sa guerra po trinta dis. Est a nai ca s’idea de Trump po sa guerra in Ucraina, dd’at fata sua, amaroglia, su presidenti Zalensky, ma Putin abarrat unu pagu prus fridu. Is Stadus Unidus, a dogna manera, ant pediu a Mosca de ponni po unu mesi sa guerra a un’ala ca chi nde chi no ant amelessau de fairi pagai datziu.
E su matessi Volodymyr Zelensky, ca at nau ca giai, narat de non tenni fidi in is russus, in su mentris chi eris Putin at fatu bisita, po sa borta de unu, a is sordau chi s’agatant in su Kursk.
Su portabogi de su Cremlinu, Dmitry Peskov, at nau “de non curriri meda” po sa pensada de serrai su fogu, nendu craramenti ca po primu cosa bolit connosciri de cussu chi ant chistionau is americanus cun is arabus. Difatis, Peskov etotu, at aciuntu: “In custas dis seus ponendu in peis de chistionai cun is americanus. E candu ddu eus a fairi boleus sciri de eita ant chistionau cun is arabus”.
Su Cremlinu non narat ca nou a sa chistioni chi possat essiri aprontada un’atra telefonada de Putin e Trump. Ma totu custu non abbisongiat a atacai sa tensioni chi s’agatat intru de Russia cun Stadus Unidus.
Comenti de impromintiu, is americanus ant torrau a pigai a donai armas e novas a Kiev e su segretariu de Stadu Marco Rubio at nau in manera crara “de airi cumbidau is russus a dd’acabbai cun sa guerra”. Dapoi, su matessi segretariu, at nau ca is europeus “ant a depiri postus in mesu”, po cicai de portai sa pagi, a pustis tres annus de disisperu. Ma a cuss’origa is russus non ci bolint intendiri.
De sa parti de is ucrainas non si creit chi sa pagi lompat inderetura: “Nemus de nosu creit a cussu chi narant is russus”, at nau su presidenti Zalensky. Su presidenti ucrainu iat a bolli chi po Mosca, una bia chi no erribat a s’acordiu de pagi, siant pigadas misuras fortis de averas.
Màuru Mura
Giobia, su trexi de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.agendadigitale.eu/sicurezza/lo-scontro-cyber-tra-russia-ucraina-occidente-le-diverse-tattiche/