“A intru de dominigu chi benit su calori in Sardigna, Sicilia e finas in Puglia at a bessiri po tocai sa temperadura de trintotu e coranta gradus, a innanti de duas dis, lunis e martis, chi ant essi prus friscas. O prus pagas caglientis. Ma “ant essi feti duas dis a innantis de, invecias, un’atra undada de ancora prus calori chi de s’undixi de custu mesi at a portai ancora prus caglienti de cussu chi seus bivenu immoi”.
Funt custas is previsionis de Larentu Tedici, metereolugu de su giassu ilmeteo.it, chi, intru e mesu, narat finas ca in totu custas dis de calori africanu s’ant a amostai, cun probabilidadi manna, finas abba e nubrifagius.
“Totu custu calori – spiegat Larentu Tedici, at essi, galu po un’atra borta, ‘carburanti’ po s’abba chi at a calai a istrossas: oramai su calori de s’istadi, in pissu de parti manna de totu s’Europa, e finas in atrus logus, est sempiri de aici, tempus de calori africanu e infusturas de abba tropicali. S’at a amostai abba po prus de centu litrus po dogna metru cuadrau cun dd’una violentzia, in oras pagas, chi una bia fut feti de is areas tropicalis o ancora meglius cussas ecuatorialis. Su calori mannu, chi est sempiri de prus, portat s’Italia in cussas zonas climaticas chi cumpartzit cun atrus medas”.
Custu poita, sighit a nai su metereolugu, “su clima est mudau: trinta o coranta annus a immoi, a su cumentzu de làmpadas, non si connosciat una temperadura de trinta gradus in su centru-nord, s’abba lompiat massimamenti in is Alpi e intru de su noti si dromiat ancora chena patiri e chena s’infundiri po su calori”.
Oi invecias, acabbat de nai Tedici, “is oceanus e su mari Mediterraneu funt sempiri prus caglientis, sa Terra si caglientat sempiri in sa matessi manera e duncas su caglienti, s’energia e su vapori a disponimentu po s’abba est sempiri de prus”.
Màuru Mura
Mercuris, su cuatru de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.toscana-notizie.it/-/consigli-utili-per-quando-arriver%C3%A0-il-caldo-le-raccomandazioni-per-anziani-fragili-e-lavoratori
