Strinta noa in pissu de s’imigratzioni e disacatu artu meda in is Stadus Unidus de America. Donald Trump at decidiu de non fairi imbucai genti, in is matessis Stadus Unidus, de atras doxi Natzionis. Est a nai: Afghanistan, Myanmar, Ciad, Repubblica del Congo, Guinea Equatoriale, Eritrea, Haiti, Iran, Libia, Somalia, Sudan e Yemen. E dapoi at finas decidiu de donai crobba manna po chini disigliat imbucai de atrus seti logus: Burundi, Cuba, Laos, Sierra Leone, Togo, Turkmenistan et Venetzuela. Totu custu, benit fatu sciri de sa Domu Arva, at a balliri giai po chini bolit migrai e giai a chini bolit torrai a partiri.
Est su matessi Trump a fairi connosciri su poita de custas restritzionis, totu est partiu de s’atacu contras is semitas in Boulder in Colorado. “S’atacu terroristicu in Boulder, in Colorado, at postu in is pumus artus su perigulu chi si currit a fairi imbucai in is Stadus Unidus, genti strangia chena dda cumpudai comenti si depit fairi”, at nau su presidenti americanu in dd’unu videu-messagiu chi at cumpartziu, in segus, in is social. Ma s’Egitu, Natzioni de is arreiginis de s’atentadori Mohamed Soliman, non s’agatat in is Stadus postus a un’ala. Atra restritzioni manna interessat s’Universidadi de Harvard po sa cali, at declarau su presidenti, no ant a podiri imbucai is discientis strangius.
Trump at, infinis, finas donau cumandu a su Dipartimentu de sa Giustissia de oberri un’indagu in pissu de sa saludi de Joe Biden. Po Trump ant atacau sa beridadi: “Totu custu est unu de is disacatus prus mannus e de arriolu de is contus americanus”, si ligit in dd’unu paperi.
Joe Biden no est abarrau a sa muda: “Chi siat craru a totus: fui deu a pigai is decisionis intru de is annus de presidentzia. Is cumandus ddus donaia sempiri deu. Decidia totu deu e a nai s’imbessi est fartzu”.
Màuru Mura
Martis, su tres de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.lastampa.it/esteri/2025/06/05/news/divieto_di_viaggio_negli_stati_uniti_per_i_cittadini_di_12_paesi_trump_non_li_vogliamo-15177405
