Immoi in Casteddu, a prus o mancu milli metrus de s’orruga intregada a Giuanni Maria Angioy, su capu truma de is rivolutzionarius, si ddue agatat una targa chi arregodat sa matessi rivolutzioni sarda, est a nai Sa Die de sa Sardigna. Fut su 28 de arbili de su 1794. Is piemontesus, a cumentzai de Pissenti Balbiano chi fut “vicerè” e de totu is funtzionarius de is Savoia, si furint fuius de Casteddu ca non boliant donai peruna carriga pubrica a is sardus.
Su Consigliu Regionali arregodat, custu mengianu is “ominis mannus”, torrendu a pigai, po s’annu de trintunu de sighiu, sa chistioni intru de su passau e su de oi chi est diventada sa Dì de su populu sardu cun su votu de totu su parlamentu sardu. Aici in su mesi de cabudanni de su 1993. De s’annu infatu benit sempiri arremonau in su palatzu de s’orruga de Roma. A oberri s’arregodu su coru de su Tiatru Lirico de Casteddu. E in segus is innus: cussu sardu, cussu italianu e cussu europeu. E dapoi su “Va pensiero” de Giusepu Verdi. “A pustis is saludus istitutzionalis de su presidenti Pieru Comandini e de s’assessora de sa Pubrica Istrutzioni Ilaria Portas, at a chistionai Antoneddu Angioni de su Sotziu de sa Die”. At agatai lgu finas “Bateros sa sardidade no este jogu”, sa chistionada-poesia de Alissandru Pili. Ant a sighiri is capus trumas e at a serrai sa governadora Alissandra Todde cun su sonadori de launeddas Luca Schirru.
In prus de Casteddu funt Bono e Alghero is logus sceberaus de s’assessora Ilaria Portas comenti simbulus de Sa Die. “Tres logus simbulus”, at spiegau sa matessi. Sa capitali sarda est su logu aunia est cumentzau totu, Bono est sa bidda aunia est nasciu Giuanni Maria Angioy e Salighera est su logu aunia, po prus de bint’annus, ant impresonau a Pissenti Sulis, un’atru de is ominis mannus de su tempus, a innantis chi Vitoriu Emanueli de Unu dd’at cuncediu sa libertadi.
Màuru Mura
Lunis, su bintotu de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.vassallidibarbero.it/2021/04/28/sa-die-de-sa-sardigna-spiegata-semplicemente/
