Vladimir Putin, su presidenti de sa Russia chi de tres annus est in guerra cun s’Ucraina guvernada de Vlodomyr Zalensky, intru de is cunditzionis po fairi acabbai custu disacatu, ponit finas sa chistioni chi is capus ocidentalis pongiant po iscritu de frimai s’ammanniamentu de sa Nato in s’orienti e a ponni a un’ala sonumancu una parti de is santzionis po sa Russia etotu.
Ddu scrit sa Reuters in su giassu de internet. Putin est prontu a fairi sa pagi, “ma non a calechisiat pretziu”, at nau unu citainu russu chi tenit poderi. Atrus tres, chi bolint abarrai in s’umbara, ant fatu sciri, sempiri a sa Reuters, ca Putin bolit un’impignu scritu de parti de is potentzias ocidentalis prus fundudas, po no ammanniai sa Nato. Totu custu bolit nai ca non depint imbucai s’Ucraina, sa Georgia e sa Moldavia.
Mosca, dapoi, bolit chi s’Ucraina abarrit neutrali, a ndi tirai calencuna de is santzionis ocidentalis, sa risolutzioni de sa chistioni de is benis russus cungelaus in Ocidenti e sa seguresa de is fueddantis russu in Ucraina. Aici is fontis russas ant scoviau a sa Reuters.
Su primu chi at scoviau is pianus de Putin, at fatu sciri ca su matessi presidenti russu chi si nd’acatat ca non si podit lompiri a un’acordiu de pagi intru is cunditzionis suas, at a cicai de amostai a is ucrainus e a is europeus, cun is vitorias de is sordaus, ca “sa pagi de cras at essi ancora cun prus dolu”.
Mosca, in segus, at finas arrespustu a Trump, chi eris incurpaiat Putin de “giogai cun su fogu”. “Cumprendeus ca Donald Trump disiglit un’acabbu coidendu de sa guerra, ma is interessus natzionalis de sa Russia funt in pissu de dogna atra cosa”, at nau su portabogi de su Cremlinu, Dmitry Peskov.
In cantu a un’atobiu intru de su presidenti de sa Russia cun cussu de s’Ucraina, iat a podiri sussediri feti a pustis “acordius specificus” in is chistioni de prus importu, at segau in curtzu su matessi Peskov.
Màuru Mura
Giobia, su bintinoi de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.radiopopolare.it/stop-allallargamento-della-nato-a-est-putin-vorrebbe-un-impegno-scritto-dalloccidente-per-fermare-la-guerra/
