Est sempiri de prus Fabiu Pisacane s’allenadori benienti de su Casteddu. A pustis s’atobiu de eris intru de Tomasu Giulini e Pàulu Vanoli, chi si funt amostaus unu cun s’atru in is uficius de sa Fluorsid in Milanu, su sceberu de su presidenti Giulini est sempiri prus de donai sa ghia tecnica a Pisacane chi, ocannu passau, at trabagliau cun is giovunus de su Casteddu, bincendu spantosamenti sa Coppa Italia contras de su Milan in sa finali de su 9 de arbilil. Aici narat, in Sky Sport, su giornalista chi connoscit beni meda su mundu de su fubalu, Giuanni Luca Di Marzio.

Pisacane, nasciu in su 1986, at giogau cun su Casteddu intru de is annus chi de su 2015 lompint a su 2021: intru de serie A, B e Coppa Italia at bestìu sa magligedda casteddaia po 152 bortas e fendu finas cincu gol (intru de custus finas s’urtimu in su Sant’Elia contras de su Milan in su 2017). In su 2022 est imbucau a fairi parti de sa filera tecnica de su Casteddu, a innantis cun Liverani e dapoi chi ce dd’ant stupau s’est setziu in sa panchina de su Casteddu in sa partida contras de su Cosenza de su 26 de Mesi de Idas de su 2022. Partida, a dogna manera, binta po 2-0. At duncas donau sa panchina a Claudiu Ranieri e issu est torrau a ghiai sa scuadra de is giovunus po dus annus: esperientzia manna e bona meda po s’alleandori campanu.

Est finas de nai ca Nereo Bonato, su diretori sportivu casteddaiu, iat airi bofiu Pàulu Vanoli e po custa arregioni iat essi facili meda chi su matessi diretori, chi s’agatat in carriga de su mesi de Sant’Andria de su 2022, si cumpartzat de sa sociedadi de su presidenti Giulini.

Duncas, a foras de atrus spantus, at essi Pisacane a ghiai su Casteddu giai a partiri de is primas dis de su mesi de orgiolas candu su Casteddu at a trabbagliai po su campionau 2025-26. Sa scuadra at a moviri in Ponte di Legno po su ritiru e at a gogai sa partida de unu in Coppa Italia (su 16 o 17 de austu) contras de chini at a binciri intru de Avellino e Audace Cerignola. A pustis, su acabbu de cida benienti, sa partida de unu in campionau cun sa Fiorentina.

 

 

 

Màuru Mura

 

 

 

Lunis, su noi de làmpadas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://soccertonic.com/it/