“Cussu chi at a lompiri, depit essiri su campionau de su totu paris: scuadra, agiudantis mius, sociedadi, tifosus e citadi”. Funt custus is primus fueddus de Fabiu Pisacane, allenadori nou de su Casteddu. S’allenadori, chi pigat su postu de Davidi Nicola chi, est de nai, at fatu su doveri, sarvendu sa scuadra, sighit su caminu in su Casteddu, a pustis is dus annus spantosus ghiendu is giovunus. Trabbagliu mannu, cussu de Pisacane e de is agiudantis sus, chi tenit sa Coppa Italia, binta su 9 de arbili passau contras de su Milan, comenti de testimonia manna. Difatis, mai, su Casteddu iat bintu calencuna cosa de importu in sa filera de is giovunus.
“Non si fraigat nudda a sa sola”, sighit a nai Pisacane a pustis de airi scritu su nomini in su cuntratu chi dd’acapiat a sa sociedadi de Tomasu Giulini. “Feti totu paris podeus ‘cumbatiri’ po dogna problema. Antzis tocat a mudai is problemas in oportunidadis. Finas in s’ora prus tostada, finas candu totu at a parri tropu dificili: est propriu tandu chi tocat a abarrai totu paris. Unu passu in donnia. Totu paris”. In tempus coidendu Pisacane at essi presentau in manera uficiali, in su mentris chi in su mesi de orgialas benint, at a cumentzai s’annu de su Casteddu, a innantis in citadi e dapoi in in baddis e montis de Ponte di Legno.
Fabiu Pisacane est lompiu in Casteddu in s’istadi de su 2025 e de sa Sardigna non si nd’est mai prus torrau a andai, a parit calencunu mesi in su 2021 po serrai de giogai cun su Lecce. Cun sa maglia de su Casteddu in pissu, Pisacane, est calau in campu, intru de Serie A, Serie B e Coppa Italia, po 152 bortas. Fendu finas cincu gol. Dapoi s’est postu a un’ala e de su campu est passau a trabbagliai cun Fabiu Liverani, chi tandu fut s’allenadori de su Casteddu. Po una borta, cun su Cosenza su 26 de mesi de Idas de su 2002, at ghiau sa scuadra de is mannus. A innantis de su lompimentu de Claudiu Ranieri. Duncas est andau a trabbagliai cun is prus giovunus, a innantis comenti agiudanti de Mateu Battilana e in segus comenti de allenadori.
Màuru Mura
Cenarba, su trexi de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://soccertonic.com/it/
Pisacane allenadori de su Casteddu
