Sighint is chistionis in Riad po lompiri a un’acordiu de pagi e fairi acabbai su fogu chi ca de tres annus est andendu a innantis. Eris is russus ant atobiau is americanus de is Stadus Unidus. Is matessis russus ant fueddau de una ciaciarrada chi a su cumentzu est parta dificili meda. In prus, a pustis s’atobiu de eris, si scit giai ca s’ant atobiai is americanus cun is ucrainus, ma custu dapoi chi s’ant a connosciri “a eita s’est lompiu intru de Stadus Unidus e Russia”.
Po cussu chi narant is russus, in is cumandus s’agataiat finas a si ponni de acordiu po umperai, in seguresa, is abbas de su Mari Nieddu, massimamenti po is navis cumercialis. Ma, at bofiu nai su portabogi de su Cremlinu Dmitri Peskos, a s’acabbu non si depit ponni su nomini in perunu paperi.
Invecias, chistionendu de sa Domu Arva, su presidenti de is Stadus Unidus Donald Trump at fatu sciri ca sa chistioni in Riad pertocat finas is “terras”. “Seus chistionendu de làcanas, seus chistionendu de energia, de propriedadi de is centralis eletricas. Calencunu naras ca is Stadus Unidus iant depiri tenni su possessu de sa centrali nucleari de Zaporizhzhia poita teneus totus is cumpetentzias po da ponni in motu”.
Est a nai ca in su mengianu, russus e americanus, si funt atobiaus a jannas serradas in dd’unu albergu erricu meda de sa capitali saudita, a pustis una ciaciarrada de su merì a innanti intru de ucrainus e rurrsus. In sa mesa, sa possibilidadi de acabbai de sparai in su Mari Nieddu, po permitiri sa torrada a s’acordiu in pissu de is ceralis chi at permitiu a s’Ucraina, de su mesi de orgiolas de su 2022 finas a su matessi mesi de su 2023, de portai foras su trigu chi produsit, chi est vida po s’alimentatzioni de totu su mundu, finas chi si ddue agataiant is navis russas in sa zona.
S’Ucraina, po contu sou, est pronta a un’acordiu de pagi in totue e chna peruna cunditzioni.
Màuru Mura
Martis, su binticincu de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.assifact.it/fact-news/conflitto-russia-ucraina-riflessi-sullindustria-del-factoring/
