Cumentzat custu mengianu, indenanti de sa Corti de Casteddu, su processu de Igor Sollai, su camionista de corantatres annus, incurpau de airi bòciu sa pobidda Francisca Deidda, de corantadus annus. Totu est sussediu in sa domu de Santu Sparau in su mesi de maju passau. A pustis chi su Gip Ermenegarda Ferrarese at donau su permissu de su processu fatu coidendu, su pubblicu ministeru Marcu Cocco, chi at cumandau s’indagu, est prontu a ponni in peis is curpas de Sollai chi, castiendu cussu chi at fatu, erriscat su presoni po totu vida.
Su bintidus de su mesi de Sant’Andria passau, a pustis chi po mesis intreus naraiat ca sa pobidda si fut fuja a sa sola de domu, Sollai – difendiu de is abogaus Carrrulu Demurtas e Laura Pirarba – e feti candu is carabineris iant arregortu una meca de provas po sa curpa chi teniat, at amitiu de airi bociu sa pobidda.
Francisca Deidda fut sparessia su dexi de maju e is orrestus sus agataus su dixiotu de triulas, a intru de una borsa manna, in su sartu intru de Sinnia e Santu Idu, in is orus de sa strada statali becia de sa 125. Totu sighendu is arrastas de su gps de sa vetura chi Sollai umperaiat po trabbagliai. Su publicu ministeru pensat ca Sollai at bociu Francisca a corpurs de marteddu a conca po, in segus, dda lassai in is orus de unu ponti romanu, allonghiu de s’orientali sarda.
Intru de s’indagu is carabineris, cun s’agiudu de su Ris, iant fatu bessiri a pigliu ca s’omini iat mudau mudau calencuna cosa de su divanu anunia iat bociu sa pobidda, bendiu is veturas e comporau, tempus pagu a innantis de dda bociri, una borsa. Sa matessi chi est serbia po atacai su corpus de Francisca. Po atras cidas, sempiri a pustis su sparessimentu de sa picioca, iat umperau su telefunu po mandai messagius a is amigus e a is collegas de sa pobidda.
Oi, duncas, cumentzat su processu: Sollai est incurau de airi bociu, e de ddu airi decidiu a innantis, po mori de arregionis sbuidas e vilis.
Màuru Mura
Mercuris, su bintises de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ilmessaggero.it/italia/francesca_deidda_moglie_uccisa_marito_sardegna-8228808.html
