“A mi setziri in pissu de sa panchina de su Casteddu, po mimi at bofiu nai de cumpartziri dogna sulidu de custa citadi: in s’allirghia chi ti pigat giai de is primas oras de su mengianu, in is noti chena dromiri a innantis de una partida de importu o cale chi siat, in sa delusioni o in sa cuntentesa de candu s’arbitru acabbat sa matessi partida. Bosi torru gratzias poita mi eis torrau a donai sa passioni de chini ponit su coru a innantis de atra dogna cosa e de chini no acabbat mai de si dda gherrai”,
Aici s’alleandori Davidi Nicola, in dd’unu scritu in is social saludat sa “familia orrubia e asula”, a s’in cras de s’uficializatzioni de s’adiosu a sa Sardigna.
“Lassu – sighit a nai s’allenadori piemontesu – unu corrunconi de mei in custa terra, e torru a partiri cun sa lebiesa che chini connoscit ca s’orgogliu beru si pesat a su costau de sa relata genuina. Gratzias meda po airi fatu cun mei su matessi caminu, po airi mudau dogna faddimentu in dd’unu valori e dogna partida binta chi apa portai sempiri a intru de mei in is intragnas”.
In segus su saludu de s’acabbu: “A su presidenti, a su diretori, a is giogadoris, a totus cussus chi trabbagliant po custa sociedadi, a is tifosus nostus. A totu sa genti chi bivit sa Sardigna. Cun dd’unu gratzias mannu e de coru chi no apa schesciri mai”.
Nicola fut lompiu in Casteddu su mesi de orgiolas de ocannu passau e in trintotu partidas de campionau at fatu trintases puntus, gratzias a noi partidas bintas e ateretantis paregiadas. Funt is binti partidas perdias chi non ci calant, ma est finas de nai ca sa scuadra no s’est mai agatada in erriscu mannu po ci calai in Serie B. S’est sarvada beni meda, candu a s’acabbu de su campionau mancaiat ancora una partida. Est finas de nai ca Nicola s’est cojau beni cun is giogadoris postus a disponimentu e chi calencunu immoi bagliat fians de prus.
Augurius mannus a Nicola, omini balenti, po su sighimentu de su trabbagliu.
Màuru Mura
Lunis, su dus de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.piazzapinerolese.it/2025/06/04/leggi-notizia/argomenti/sport-24/articolo/dopo-la-festa-salvezza-la-separazione-davide-nicola-non-allenera-piu-il-cagliari.html
