Giorgia Meloni atobiat Donald Trump po sa borta de tres in dd’una pariga de mesis, ma est issa, in pissu de totus, intru de totu is presidentis europeus a atobiai su presidenti americanu a pustis chi su cumentzu de sa “guerra de is datzius”. “Grandu personi”, at nau issu donendudeddi su “beni benia” in sa West Wing de sa Domu Arva, e giai de su cumentzu de s’atobiu ant amostau allirghia unu cun s’atra. “Mi pragit meda, est una de is pagas presidentis chi balint in su mundu. Una presidenti manna chi est fendu unu trabbagliu mannu in Italia”. E galu: “S’Italia podit essiri s’amigu meglius de is Stadus Unidus chi Meloni abarrat in sedda, sa relata nosta est bona meda”.
Cun sa “sugeridora europea de Trump”, “Europe’s Trump whisperer”, aici est lamada de is giornalis americanus, s’est tentu a innantis una ciaciarrada a jannas serradas, totu po un’ora de arrellogiu. Dapoi in su Studiu Ovali cun su paris de is giornalistas americanus e italianus.
De sa Meloni est partiu inderetura su cumbidu, agradessiu de Trump, “a benni in bisita uficiali in sa Natzioni nosta”, “una oportunidadi de podiri atobiai s’orrestu de is presidentis europeus” e “torrai a tenni s’Ocidenti un’atra bia mannu meda”. Peruna duda po ponni in peis una solutzioni in pissu de is datzius cun Bruxelles. Su presidenti de is Stadus Unidus est seguru de si podereai un’acordiu in totu cun s’Unioni Europea, ma finas cun sa Cina. Trump arremonat finas chi, a dogna manera, at a agatai un’acordiu “po ponni in paridadi sa bilancia de is Stadus Unidus cun s’orrestu de su mundu”.
Atra chistioni caglienti meda intru de is dus es cussa de sa difesa: s’Italia est pronta a ndi pesai s’impignu italianu cun su 2% de su Pil, aici narat sa Meloni. “Ddu scieus beni chi sa chistioni de sa difesa est de importu mannu”, narat cun is giornalistas a pustis sa ciaciarrada a jannas serrada: “S’Italia est lompendu a su 2% comenti eus giai decidiu, non eus fueddau de una percentuali frima, ma scieus ca sa chistioni de sa difesa est de importu po su tempus benienti e connosceus su trabbagliu chi ancora depeus fairi”.
Màuru Mura
Giobia, su dixiaseti de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://gds.it/articoli/cronaca/2025/04/17/incontro-trump-meloni-rafforzare-entrambe-le-sponde-dellatlantico-a58401a5-1b1d-49a4-8e4a-16b5b607becc/
