Genti de averas meda a sa manifestada de su primu de Maju in Roma. Totu aprontau de is sindacaus de Cgil, Cisl e Uil. In conca de su corteu su segretariu de sa Cgil, Mauritziu Landini, a su costau de su striscioni chi pigat is fueddus de sa dì “Paris po unu trabbagliu seguru”. Intru de is scritas de sa Cgil, finas cussas chi arregoadat is referendum in pissu de trabbagliu e citadinantzia d s’otu e su noi de làmpadas cun sa scrita “Su votu est sa rivolta nosta”. E un’atru sun is fueddus: “Si votat ca giai”.

De Landini partint inderetura fueddus contras de su guvernu, massimamenti po s’atobiu de s’otu de maju, aunia s’at a chistionai de sa seguresa intru de su trabbagliu: “A is atobius nosu lompeus sempiri – narat su segretariu Landini – ma, immoi, tocat chi si mudit poita po s’ora ant fatu atru. Naraus ca non tocat a lompiri cun is decisionis giai pigadas. Aici non serbit a nudda, ca est erribada s’ora de dd’acabbai feti cun is fueddus, ma abbisongiat de giumpai is problemas. E chi ddus bolint giumpai tocat a donai is arrespustas a is preguntas chi eus giai fatu. Is atobius depint essiri cun chistionis serias”.

Su guvernu, “no est fendu cussu chi depit, ddu amostant beni meda. Finas poita is mortus de trabbagliu funt sempiri de prus e non calant po nudda. E funt pesendusindi finas is infortunius. Seus in denanti de unu disacatu mannu chi tocat a frimai a innantis de totu. Non bastat feti a ponni dinari a curriri, e mancu meda, ma abbisongiat a mudai is leis. Totu custu ddu seus nendu de tempus meda, ma ancora non s’ant postu menti”.

In sa manifestada si ddue agataiat finas sa segretaria de su Partidu Democratigu Elly Schlein, chi at saludau a Landini imbrassendudeddu.

Sa dì de eris est cumentzada cun sa presidenti Giorgia Meloni chi in X at chistionau de is arresurtaus de su guvernu in sa chistioni de su mundu de su trabbabliu. A contu de sa Meloni is postus de trabbagliu funt crescius finas a unu milioni in prus. MA, cosas medas, a Landini non torrant is contus.

 

 

 

 

Màuru Mura

 

 

 

Cenarba, su dus de maju de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.ilfattoquotidiano.it/2025/05/01/primo-maggio-landini-spese-armi-tutela-salute-video/7971830/