Sighint, chena si frimai, is atacus de Israele in su Iran, massimamenti in Teheran. E in su noti s’Iran at arrespustu cun dd’una filera de missilis. Eris is israilianus nd’ant bòddiu sa televisioni natzionali iraniana bocendu tres personis. Est girendu in totue, in sa rete, su videu cun sa giornalista chi si fuit.
“S’aeronautica militari israiliana cumandat su celu de sa capitali iraniana. Custu mudat in totu s’arregioni de s’atacu”, at nau Netanyahu, chi no at escludiu de bolliri bociri sa Ghia manna de s’Iran, s’ayatollah Khamenei, chi de cenarba passada s’agatat in dd’unu “bunker” a suta de terra: “Chi ddu boceus acabat sa guerra, de seguru no at essi peus de immoi”, at nau su matessi capu de Israele. Khameini e is atrus ominis iant essi cichendu unu caminu po si nd’andai de Teheran e is bogis narant ca si bolint fuiri in Mosca.
Insoma, Israele sighit, ma de Teheran lompint signalis de bandela arva. S’Iran, po cussu chi narat su Wsj e cunfrimat su presidenti de is Stadus Unidus Donald Trump, iat essi a disponimentu po chistionai e po frimai is missilis e is bombas. Frima sa spusta de su capu de Israele: “Sa cosa non m’interessat!”. Eris su G7 s’est atobiau in Canada. In su paperi de s’acabbu de is seti, e in su a intru ddu est finas su matessi Trump chi at lassau a innantis s’atobiu nendu: “Totus iant depiri lassai Teheran”, si narat de frimai sa guerra intru de Israele e Iran e de si frimai finas in Gaza. In prus su G7 narat ca “S’Iran mai at a tenni is armas nuclearis” e ca “Israele tenit su diritu de si difendiri”.
Dapoi su presidenti Donald Trump at cunfundiu is alleaus nendu ca est stetia una faddina manna a nci stupai a Vladimir Putin de cussu chi tandu fut su G8, a pustis chi sa dì a innanti iat acetau sa mediatzioni de su matessi Putin in sa guerra de su Orienti de mesu, inderetura postu a un’ala de Macron e de is atrus presidentis de Natzioni.
Màuru Mura
Lunis, su seixi de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.geopop.it/israele-attacca-liran-e-bombarda-i-siti-nucleari-cosa-e-successo-e-le-ragioni-dellattacco/
