Una bona pariga de giogadoris de sa Serie funt acabbaus suta indagu po mori de una filera de scumissas chi, a dogna manera, non pertocant su fubalu.
Is scumissas iant essi fatas finas a su 2023. Intru de is nominis de is giogadoris suta indagu po airi scumitiu aunia non ddu podiant fairi s’agatnat is nominis de Nigolò Fagioli, Sandru Tonali, Weston Mckennie, Raoul Bellanova, Angel Di Maria, Nigolò Zaniolo, Alissandru Florenzi, Matia Perin, Samueli Ricci, Mateu Cancellieri, Liandru Paredes, Cristian Bonaiuto, Mateu Falzarano, Adames Firpor e Marcu Sartori. Postus in mesu finas atrus sportivus, intru de custus su tennista Mateu Gigante
Is giogadoris, po cussu chi benit fatu connosciri, iant essi suta indagu po airi scumitiu in giassus foras de lei e po airi fatu connosciri custus giassus a atrus cumpangius.
Po cantu si scit, is giogadoris non erriscant meda po cantu pertocat sa giustissia de is ominis, aunia totu si podit arrangiai cun dd’una multa in dinari. At essi de biri cussu chi ant a fairi in sa Procura generali de sa Figc, a sa cali is indagadoris ant a mandai is paperis.
Tonali e Fagioli ant giai pagau datziu cun sa mesura de non podiri calai in campu po prus o mancu un’annu. Ma is matessis giogadoris de mesu campu de sa Fiorentina e de su Newcaste, po is indagadoris “in prus de airi scumitiu, funt cussus chi pinnigaiant su dinari po scumitiri”. Is dus, difatis, funt acabbaus suta indagu finas po airi fatu connosciri aunia si podiat scumitiri. Is atrus, invecias, depint arrespundiri “feti” de airi scumitiu.
In is paperis si ddue agatant finas is nominis de giogadoris chi non funt suta indagu, ma iant airi agiudau is cumpangius a pagai is depidis. Intru de custus Fideli Gatti chi at lassau giai corantamila eurus a Fagioli po pagai su depidu. Tzirmoniaus in is paperis, ma non suta indagu, finas su portieri Stevini Turati e su difensori Radu Dragusin.
Màuru Mura
Cenarba, s’undixi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ilmessaggero.it/sport/calcio/calcioscommesse_illegali_cosa_rischiano_calciatori_serie_a_penale_sportivo_figc-8773098.html
