“Hamdam Ballal est liberu e at a torrai a domu sua de sa familia”. A ddu nai est Yuval Abraham, chi fait sa matessi arti de su regista palestinesu, bincidori de s’Oscar cun su documentariu “No other land”, acapiau s’atra dì de sa politzia israialiana a pustis is atumbus intru de palestinesus e colonus in Cisgiordania.
S’omini de trintases annus at passau su noti in sa cella. “Ddu ant poderau acapiau po totu su noti e finas scutu. Totu a intru de una basi militari”, at scritu Yuval Abraham in X. S’acapiu eris a pustis chi is colunus funt lompius in is orus de su villagiu de Susya, in sa Cisgiordania de basciu, tirendu perdas contras de veturas, domus e personis. Finas Ballal ddu ant scutu e a pustis acapiau de parti de is ominis de s’Idf.
“Una truma de colonus si dd’at pigada cun sa domu de Hamdam, cus su cali eus fatu paris su film. Ddu ant scutu in conca e in totu s’orrestu de sa person. In su mentris chi fut lantiau e perdiat sanguni, is sordaus funt imbucaus in s’ambulatzia chi iat lamau e ddu ant acapiau. De tandu non si funt tentas prus novas e no est craru a nemus chi ddu ant curau o eita dd’est sussediu”, is fueddus de Abraham, chi at amostau in is social unu videu chi fait biri unu colonu mascarau chi carrigat su villagiu de Ballal. “Ant sighiu a carrigai finas is ativistas americanus, seghendu sa vetura insoru a corpus de perda”, at aciuntu su regista israilianu.
Est a nai ca su tres de martzu passau, “No other land”, chi contat de su sciasciamentu de su villagiu palestinesu de Masafer Yatta, in sa Cisgiordania, po mori de s’Idf, at bintu s’Oscar in sa filera po is documentarius. Po ddu girai funt serbius dus registas palestinesus Ballal e Basel Adra, ambos chi biviant in Masafar Yatta, e dus registas de Israele, Yuval Abraham e Rachel Szor. In pissu de palcu, in Los Angeles, dus de is cuatru registas, unu de sa Palestina e s’atru de Israele, ant pediu diritus po is palestinesus e un’acabbu de sa guerra.
Màuru Mura
Mercuris, su bintises de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.giornatedegliautori.com/news-2025/hamdan-ballal-e-libero/
