Perunu atobiu spantosu, peruna cerimonia manna: oi sa Sardigna, ma non feti s’Isula, arremonat a pustis un’annu sa morti de Gigi Riva, su giogadori de fubalu chi ha fatu prus gol, est a nai trintacincu in corantaduas bias chi est calau in campu, cun sa scuadra de sa Natzionali italiana. Ma non feti custu fut Riva, ca de su Casteddu est stetiu su simbulu prus mannu, e finas cussu chi iat fatu prus gol, de su scudetu bintu su doxi de arbili de su 1970. E ddu fait in sa manera chi iat airi bofiu issu, e comenti pediu de sa familia: po arregodai Riva perunu spantu, ma feti una missa, po is ses de merì in sa Basilica de Bonaria. Cussu matessi logu chi, ocannu passau, iat bidu genti meda-meda saludai po s’urtima bia non feti su giogadori, ma massimamenti s’omini.
“Un’annu chi est passau deaveras coidendu – is fueddus de Nigola Riva, su figliu prus mannu de Gigi – deu, a dogna manera, torru gratzias a totu s’amori de sa genti e mi sussedit calencuna borta a intendiri ca babbu est sempiri in custu mundu.
Sa missa de custu merìceddu at essi po totus “poita a s’acabbu est sa matessi cosa candu si fueddat de babbu – aciungit Nigola – est in calencuna manera una missa po sa familia oberta a totus poita cumprendeus ca babbu non fut feti su nostru, ma fut de sardus medissimus e duncas eus pigau sa decision de dda fairi aici po custu. Chini bolit benni bengiat. De seguru no est una missa a cumbidu. Su nostru est unu sceberu de semplicidadi, comenti babbu iat airi bofiu e comenti fut issu e totu”.
De seguru presenti s’at agatai una delegatzioni de su Casteddu: su presidenti Giulini dominigu, a s’acabbu de sa partida binta cun su Lecce po 4-1, s’est amostau in s’atobiu cun is giornalistas po arregodai Riva. Un’arregodu chi est sempiri craru, cussu de Riva, nasciu in Leggiuno, ma prus sardu de is sardus: finas dominigu in sa partida cun su Lecce a su minutu de undigi, comenti su numuru de sa magligedda sua, de sa genti est partia una batidura de manus. E a pustis sa bogi: “C’at feti unu Gigi Riva”.
Màuru Mura
Mercuris, su bintidus de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://roma.corriere.it/notizie/cronaca/24_gennaio_23/gigi-riva-e-roma-all-olimpico-il-trionfo-agli-europei-68-e-il-primo-grave-infortunio-62b0b09d-6bde-4117-82c7-f8a9c329exlk.shtml
