Su Casteddu bolat, cun bintunu puntus, finas cuasi a metadi de sa classifica de sa Serie A. Sa spantosa vitoria de eriseru cun su Lecce e is arresurtaus de is atras scuadras, chi gherrant po non ci calai in Serie B, permitint a sa scuadra de Nicola non feti de ponni a un’ala sa zona caglienti, ma finas de giumpai cincu scuadras. Totu aspetendu sa partida de custu merì intru de su Como e s’Udinese.
Unu 2025 de ammaju po su Casteddu, cun seti puntus in tres partidas: est a nai sa sa partida binta cun su Monza, su paregiu cun su Milan in domu sua e su 4-1 serbiu a su Lecce. Est stetia una giornada de campionau, cussa de bintunu, de importu mannu po is sardus ca ant godangiau dus puntus cunfroma a su Parma e a su Venetzia, ca eriseru a pustis prangiu ant paregiau po 1-1. Ma non feti, poita su Casteddu at pigau tres puntus a s’Empoli (chi at perdiu eriseru a meri po 3-1 contras de s’Inter de Inzaghi), a su Monza (custa puru batia po 3-1 in sa partida de sabudu contras de su Bologna de Italiano) e su Verona (chi eriseru a is ses at perdiu in domu, contras de sa Latzio de Baroni, po 3-0). Su matessi est sussediu cun su Lecce: tres puntus godangiaus a custus puru. Est a nai a totu is scuadras chi funt gherrendu de su cumentzu de su campionau, a is calis andant aciuntas de seguru su Genoa (chi at perdiu po 3-1 in sa partida giogada in s’Olimpico de Roma, contras de sa scuadra de Caludiu Ranieri) e su Torinu (chi est andau a paregiai in Firentze, contras de sa Fiorentina de Palladino, eriseru a ora de prangiu po 1-1) chi s’agatant a bintitres puntus. E propriu cun su Torinu de Paolo Vanoli at essi sa partida benienti po su Casteddu cenarba chi benit, su binticuatru de gennargiu, in su stadiu Grande Torino, cun cumentzu de partida a is noi oras mancu unu cuartu.
Chi si bincit in Torinu, e sa cosa est possibili po su Casteddu, si podit finas serrai sa gherra casteddaia.
Màuru Mura
Lunis, su binti de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=3x2AV_YRDjs
