Feti un’atra bia, ocannu, su Casteddu iat bintu una partida cun prus de unu gol in prus de s’atra scuadra: in su 4-1 contras de su Lecce. Is tres gol de eris a su Monza acostiat de meda sa mira de si sarvai, ma Davidi Nicola bolit chi sa scuadra poderit craramenti s’atentzioni in is atras partidas: “Non tocat a pensai ca cun custus tres puntus seus sarvus de ci calai in sa serie B. Oi non fut una partida facili finas chi su Monza lompiat in Casteddu de urtima de sa classifica. Sa scuadra de Nesta tenit giogadoris de calidadi manna e at a strobbai totus cussu chi at atobiai. Nosu non deipiau faddiri custa partida e ce dda eus fata”.
Su contu de is noranta minutus de eris, po cussu chi narat s’allenadori casteddaiu, est cussu de unu Casteddu chi ce dd’at fata a ponni in campu su trabbagliu chi at fatu intru de sa cida. “Est partida e vitoria chi balit meda poita nosi serbit po amostai ca scieus giogai. In sa parti de unu eus cuberau beni sa bocia e bessiaus beni da sa parti nosta de campu. A dolumannu nosi mancaiat sa calidadi po fairi gol. Invecias, in sa parti de duas, candu eus fatu su gol de unu, est mudada sa partida. Ma s’eculibriu de comenti fustis gioghendu non depiat mudai, po nosu funt de importu tropu mannu custus tres puntus. Immoi tocat giai a castiai sa partida benienti”. Est a nai cussa de dominigu chi benit, a is tres de a pustis prangiu, in Empoli. Sa scuadra toscana chi su campionau iat essi acabbau oi ci fut calada in serie B paris a su Monza e su Venetzia e immoi s’agatat a ses puntus in basciu de is sardus. “Non sciu chi sa partida cun s’Empoli at a serrai sa chistioni po nous, ma chi binceus nosi acostiaus sempiri de prus a sa mira chi teneus de su cumentzu de custu campionau”, segat a curtzu Davidi Nicola. Eus a benni a biri, ma si cumprendit beni ca bincendu dominigu, o finas non perdendu, sa classifica iat a erriri sempiri de prus.
Màuru Mura
Lunis, su trintunu de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=xGjdk6BAAPo
