A pustis chi is olandesus de su Feyenoord c’ant stupau su Milan (1-1) e is belgas de su Bruges ant fatu su matessi cun s’Atalanta (1-3), eris un’atra scuadra olandesa, su PSV Eindhoven, at bogau a foras de is otavus de finali sa Juventus. Sa scuadra bianca e niedda fut lompia a custa partida in segus de sa partida binta sa cida passada in Italia, po 2-1. Parit chi sa copa cun is origas, aici benit lamada, non tengiat peruna gana de lompiri in sa sociedadi de sa familia de is Agnelli.
In su Philips Stadion de Eindhoven, dapoi de una parti de unu aunia is duas scuadras si funt feti fragadas, fait gol Perisic, giogadori chi in Italia si fut amostau cun sa maglia de s’Inter in pissu, chi iat giai segnau in Torino, a su cumentzu de sa parti de duas. Sa scuadra de Thiago Motta ce dd’at fata, intru de dexi minutus a torrai a ponni totu in paris cun dd’unu tiru forti e precisu de Tim Weah, ma is olandesus de s’Eindhoven a su minutu de setantacuatru ant torrau a ponni sa partida in paridadi, ossumancu tenendu contu de cussa giogada sa cida passada. Su gol de su 2-1, chi at donau sa possibilidadi a is duas scuadras de allonghiai sa partida, ddu at fatu Saibari.
Dapoi de seti minutus de su cumentzu de sa parti de tres, is olandesus faint ancora gol cun Flamingo e is giogadoris de sa Juventus si funt agataus custrintus a atacai po agatai cussu gol chi podiat donai spera. C’at provau Vlahovic, imbucau a su postu de Kolo Muani, ma de acanta a sa porta nemiga nd’at boddiu feti su palu de sa janna olandesa.
In sa parti de dus de is suplementaris ancora sa scuadra de Motta at provau cun su disisperu de amelessai s’eca olandesa, ma fut su PSV a s’acostiai de nou a fairi gol, cun Di Gregorio chi at spantau, massimamenti a serrai su caminu a Til. Ma, nudda mudat cunfroma a su 3-1 e is olandesus si cualificant a is otavus de sa Champions.
Màuru Mura
Giobia, su binti de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://freeskipper.altervista.org/archives/44459
