Est finas sa Sardigna a timiri meda po cantu pertocat is datzius postus in peis de s’aministratzioni de su presidenti de is Stadus Unidus Donald Trump. Massimamenti a arriolai de prus po sa terra nosta funt is fileras de su casu pecorinu romanu e de su binu. Feti po fairi cumprendiri cantu est mannu s’arriolu bastit a pensai ca su 60% de su casu chi si fait innoi in Sardigna, lompit in sa terra a steddas e striscias.
Su segretariu a su Cumerciu americanu at assegurau ca Donald Trump “no at a torrai a palas po is datzius”. In dd’una ciaciarrada intru de sa Cnn e Howard Lutnick cust’urtimu at nau ca su presidenti americanu est “frimu meda a andai a innantis”.
Emmanuel Macron at chistionau eris de is datzius comenti de una mesura “legia e chi non tenit fundu” e “un’arvolotu mannu po totu su cumerciu in totu s’orrestu de su mundu”. Su presidenti francesu at atobiau, in s’Eliseo in Parigi, totu sa filera de is imprendidoris, mascamente cussus chi faint sartai su mari bia is Stadus Unidus. Su matessi Macron at nau chena mesus fueddus: “S’arretzeta de chini tenit is contus postus mali no est cussa de ammanniai is datzius”, nendu finas ca custus ant a donai “problemas po s’economia europea”.
Sa Spagna, invecias, at a ponni in campu mesuras po 14 miliardus de eurus po agiudai is aziendas e is postus de trabbagliu de sa genti sua. Ddu at nau su ministru de unu Pedro Sanchez. Su capu de is socialdemocratigus at nau ca sa Spagna s’at a moviri inderetura po non fairi pesai, in pissu de is citadinus, su datziu de su 20%, decidiu de su presidenti americanu Trump in pissu de sa cosa chi lompit in is terras americanas.
Sa presidenti de su Consigliu italianu, Giorgia Meloni, at postu a un’ala totu is atobius chi tenia po oi, in manera de podiri pensai a is mesuras chi s’Italia at a pigai po custa chistioni. Sonumancu est cussu chi ndi bessit a foras de Palatzu Chigi.
Màuru Mura
Cenarba, su cuatru de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.agendadigitale.eu/mercati-digitali/la-guerra-dei-dazi-la-minaccia-trump-sulleconomia-globale/
