Est mortu Oliviero Toscani: ddu at fatu sciri sa familia sua in dd’unu scritu donau a is giornalis: “Cun dolu mannu donaus sa nova ca oi, 13 de gennargiu de su 2025, su nostru Oliviero at cumentzau un’atru caminu. Pedeus, cun gentilesa de nosi lassai a sa sola e de cumprendiri ca custu caminu ddu boleus fairi intru de nosu in familia. Kirsti Toscani cun Rocco, Lola e Ali”, si ligit in su paperi de sa pobidda Kirsti e de is figlius.
Su fotografu famau, chi teniat otantadus annus, fut in su spidali de Cecina, po mori ca sa maladia sua fut posta ancora prus mali, de su 10 de gennargiu. De dus annus a cust’ala – comenti iat nau in dd’una intervista a su “Corriere della Sera” su 28 de austu passau – sunfriat de amiloidosi: “In dd’unu annu soi calau de coranta chilus. Non ce dda facu nemancu a bufai su binu ca su sabori benit mudau de is meiginas chi pigu”, contaiat, nendu finas ca iat airi provau unu sanamentu sperimentali e de non timiri sa morti. “Mi iat a bastai de non sunfriri. Est de nai ca deu apu biviu po tempus meda e e finas beni, soi afitziau. No apu mai tentu unu meri e unu stipendiu. Soi sempirti stetiu liberu”. Sempiri in s’intervista iat chistionau de s’intentzioni de fueddai cun “s’amigu Cappato” po sceberai de si bociri, acumpangiau de is dotoris, in Svitzera.
Finas a s’acabbu de sa vida sua Toscani at portau a innantis sa fortza manna de is pensadas chi portaiat in conca, est a nai cussas de un’omini chi at mudau po sempiri su mundu de sa fotografia. Po mori ca, candu umperada sa machina po tirai fotografias, faiat sempiri fueddai a totus sa maera sua. Chini non s’arregodat sa publicidadi de is pantalonis cun su scritu “Chini m’anat mi sighit” cun su basu intru de unu predi e una mongia? O chini non s’arregodat sa fotografia cun is cundennaus a morti o su corpus de una femina spaciada de s’anoressia? Toscani fut custu, unu chi cun sa fotografia at postu in atentzioni paricias chistionis.
Màuru Mura
Martis, su catodixi de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.livornotoday.it/cronaca/morto-oliviero-toscani-funerali-livorno-domani.html
