Radja Nainggolan at passau sa noti in presoni e oi s’at a amostai indenanti de su giuigi istrutori. Aici narant, sonumancu, is giornalis de su Belgiu. Difati su giuigi depit decidiri chi ddu lassai andai o chi ddu impresonai ancora. Tocat feti a cumprendiri cantu fortis siant is curpas suas.
Su giogadori de mesu campu, chi at giogau in Italia cun Piacenza, Casteddu, Roma e Inter, est in mesu a un’indagu in pissu de droga po mori de una truma criminali chi portaiat cocaina de s’Ameriga de basciu in Europa, intru de su portu de Anversa. Is curpas de Naingollan, sempiri po cussu chi si ligit in is giornalis belgas, iant essi de cambiai su dinari de sa matessi truma.
Nainggolan ddu ant acapiau eris a mengianu. Cun issu, is manetas funt lompias po atrus cuindixi e in s’operatzioni funt stetius secuestraus cuasi tres chilus de cocaina, armas, 370 mila eurus, prendas, orologius chi costant meda, veturas e monetas de oru.
Su giogadori at nau craru e tundu de non c’intrai nudda in custa chistioni e s’abogau Me Omar Souidi aici at fueddau: “Est unu giogadori de fubalu no unu dellecuenti. M’aspetu chi torrit in campu in Lokeren cantu a innantis. Est feti cicau in is paperis, ma ancora non ddu ant incurpau. Feti poita depit arrespundiri a certas pregunts non bolit nai ca tengiat a ita biri in totu custu contu”.
Su “Ninja” de tempus iat lassau su fubalu famau e una cida a immoi, a pustis chi fut de tempus meda chi non giogaiat, iat agatau scuadra, su Lokeren chi giogat sa serie B de su Belgio. In sa prima partida iat spantau totus cun dd’unu gol fatu de sa “bandierina”.
Candu ddu ant acapiau Nainggolan s’agataiat in domu de sa sposa e sa politzia at cumpudau sa domu de su giogadori.
Sa scuadra de su Lokeren at inderetura fatu girai unu paperi: “Posca ca ancora s’indagu no est acabbau, sa politzia non donat e non podit donai novas. Po nosu balit chini no est ancora cundennau est sempiri innocenti. Podeus feti nai ca su giogadori non fut in campu po s’allenai”.
Màuru Mura
Martis, su bintotu de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.adnkronos.com/sport/nainggolan-arrestato-belgio-traffico-cocaina_7aaa2H3aLBiNC1yizyYJNV
