Cun is partidas de eris a merì est acabbau, a pustis trintotu giornadas, su campionau de Serie A. Est a nai, inderetura, ca po giogu e giogadoris no at essi arregodau comenti de unu de is meglius. Ddu bincit su Napoli, chi aici festat su scudetu de cuatru in sa storia sua. Ma a ddu perdiri est s’Inter chi, massimamenti in certas partidas at deludiu meda. Ma is nieddus-asulus si podint torrai a fairi sabudu chi benit cun sa Champions League. In is primas tres agataus finas s’Atalanta chi, de tempus meda, no est prus unu spantu e chi ocannu ddue creiat unu pagu de prus podiat binciri. Is bergamascus ant faddiu, in s’ora chi depiant binciri, tres partidas facilis cun Casteddu, Torinu e Venetzia: tres puntus in tres partidas, in domu, chi depiant essiri noi.
Ocannu chi benit ant a giogai in Europa custas tres, in prus de sa Juventus, in sa Champions League, sa Roma cun su Bologna, po miniscimentu ca at bintu sa Coppa Italia, in Europa League e sa Fiorentina in sa Confedence League. Sa Latzio abarrat foras po mori de s’urtima partida perdia cun su Lecce. Is matessis pugliesus si sarvat, po sa borta de tres de sighiu, e aici etotu faint su Casteddu, su Verona e su Parma.
A c’acumpangiai su Monza in Serie B, ca funt de tempus meda giai cundennaus, ant essi su Venetzia, chi a dogna manera no est chi podiat fairi de prus, antzis est giai tropu a airi gherrau finas a s’urtimu, e s’Empoli, chi est de corant’annus fendu s’artzia e cala.
Is atras scuadras, est a nai Como, Torinu, Udinese e Genoa, non funt né petza e né pisci e ant passillau in manera trancuilla finas a si sarvai chena perunu perigulu.
Sa peus de totu is scuadra, po nosu, est stetiu su Milan. Difatis is lombardus furint partius po si dda gherrai, massimamenti po su scudetu, invecias a innantis cun Fonseca e dapoi cun Conceicao ant amostau poberesa de giogu e giogadoris chi non si podint biri.
Màuru Mura
Lunis, su bintises de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.adn24.it/blog/2025/05/23/napoli-campione-ditalia-2025-il-quarto-scudetto-e-realta/
