Su presidenti ucrainu Volodymyr Zalensky est lompiu in Villa Doria Pamphilj in Roma, aunia a ddu aspetai si ddue agataiat sa presidenti de su consigliu Giorgia Meloni. A pustis un’imbrassu a forti intru de is dus presidentis, in su foras de su Casino del Bel Respiro, Zelensky est stetiu saludau de is Lancieri de Montebello. A s’acabbu de is innus natzionalis de s’Italia e de s’Ucraina, si funt stesiaus po cumentzai a fueddai. S’atobiu de Roma est su de tres, a pustis Londra e Parigi, po su presidenti de s’Ucraina. E cras, su matessi Zelensky, at atobiai su Paba in su Vaticanu e su cancellieri tedescu Scholz in Berlino.
A pustis chi non s’est fatu s’atobiu de Ramstein, su presidenti ucrainu at cumentzau su caminu europeu lompendu in cuatru capitalis europeas in corantotu oras. Totu po agatai unu agiudu politigu e militari chi po issu est de importu mannu. In totu is atobius at postu in craru ca “acabbai sa guerra” no est una “chistioni” in is contus de custas bisitas e chi Kiev non tenit nudda de donai, po cantu pertocada is terras, a sa Russia de Putin.
In Dowing Street, Zalensky at amostau su pianu po andai a binciri a su premier ingresu Keir Starmer e a su segretariu de sa Nato Mark Rutte. In prus de s’amostu de custu pianu, su caminu chi est fendu Zalensy serbit po erriciri s’agiudu militari de sa genti amiga. “S’agiudu nostru est sempiri su matessi”, at nau a dogna manera, in Parigi, su presidenti francesu Macron. Ma, intru de is errigas, de is fueddus crarus, dogna dì in prus de guerra est unu disisperu po is buciacas de is bilancius ocidentalis chi donant dinari po is sordaus de s’Ucraina.
De su Regnu Unidu, intantis, lompint giai is primus arresurtaus de sa bisita de Zalensky: po cussu chi narat su Times, sa Difesa britannica est pensendu de mandai in Ucraina istrutoris militaris.
Màuru Mura
Cenarba, s’unidixi de santu Antine de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.avvenire.it/attualita/pagine/meloni-zelensky
