“Ilaria disigliat un’Europa chena sa drestra fascista o nazista chi cumandit. Po custu est andada in Ungheria a morrungiai in ocasioni de sa ‘Dì de s’onori’. Issa pensat chi abbisongit cumbatiri contras de custus machioris chi lompint de su tempus passau”. Funt is fueddus de Robertu Salis, babbu de Ilaria, in Casteddu po sa campagna eletorali po agiudai sa figlia, candidada in sa circoscritzioni de is isulas, cun “Alleanza verdi e sinistra”.
Una relata strinta meda cun sa Sardigna, cussa de sa maista impresonada in Budapest: “Giai de candu fut pipia Ilaria lompit in Sardigna po passai is vacantzas. S’urtima bia est erribada ses mesis a innantis de essiri acapiada, seus andaus, paris, de una parti a s’atra de s’isula cun sa moto”, arregodat Robertu Salis.
Su matessi babbu narat finas ca “est una bregungia manna chi si connosciat aunia Ilaria s’agatat a is acapius in domu”. Chistionat, intru de atru, de sa chistioni benia a pigliu a pustis chi sa figlia at lassau su presoni, seixi mesis da poi de su cumentzu de sa presonia.
“S’ambasciadori italianu in Budapest”, at sighiu a nai Salis, “m’at nau de aiiri tentu garantzias mannas de su ministru ungheresu po non fairi sciri aunia Ilaria s’agatessit. Aici no est stetiu. E tandu sa chistioni si cumpartzit in duas fileras: O su guvernu italianu no est capassu de si fairi intendiri de unu guvernu ungheresu amigu, chi nde chi nò non possu pensai a un’amelessu in is cunforntis de una candidada a su parlamentu europeu.
Po Roberto Salis “Ilaria est vitima de unu processu politigu, una contras de su fascismu chi est stetia impresonada chena arregioni e torturada po trintacincu dis, unu tempus de presonia tostau, chena perunu agiudu, chi non basciu meda, de s’ambasciada italiana in Ungheria”. Sa spera immoi est chi siat feti un’arregodu!
Màuru Mura
Lunis, su bintiseti de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.affaritaliani.it/politica/roberto-salis-candidatura-ilaria-col-pd-che-pasticcio-gestita-malissimo-910114.html
