Po Andria Deidda “no est Paschigedda”. S’allirghia po is festas est posta a un’ala de “sa tristura” depia a sa morti de sa sorri, Francisca, bòcia de su pobiddu Igor Sollai.
In sa Paschigedda de unu chena Francisca, Andria donat is emotzionis suas a sa’abogau Giuannifrancu Piscitelli, chi in dd’unu scritu longu cicat de amostai is emotzionis de su piciocu.
“Sa morti de sorri sua e sa seguresa de non dda podiri prus biviri si fait intendiri meda a fundu e lassat unu sbuidu chi non fait a preniri. Su calori de is lugis de Paschigedda non ce dda fait a caglientai unu coru imboddiau de dolu. E is arregodus de “una prima parti de vida paris indenanti a is lugis chi prenint su paris de sa mata de Paschigedda” arregodus chi s’amostant in dd’una fotografia posta paris a su scritu, “torrant durcis e marigosus comenti de is musicas de is cantzonis de fasta”.
Unu “nù a is gangas” stringit Andria Deidda e “donat strobbu a is fueddus de fairi cumprendiri in totu su dolu e sa suferentzia”. Sempiri sa matessi pensada po sa sorri chi non s’agatat prus in su mundu, “bòcia de cuss’omini chi, po prus de bint’annus, iat bofiu beni, cuss’omini chi dda depiat difendiri, comenti in manera fartza iat giurau sa dì chi si funt cojaus”.
“Sa spera e sa fidi de unu benienti chena umbras parit a tesu meda, unu bisu in su desertu de su dolu. Giustitzia e Beridadi po Francisca funt in is manus de ominis chi ant a decidiri cun sa lei. Andria, a su cali soi acanta non comenti de abogau, ma comenti unu fradi mannu, non m’at mai chistionau de vendeta, ma mi castiat cun ogus trstus e chena difesa e mi pregontas ‘Poita’”, sighit a scriri s’abogau.
Piscitelli, chi s’arregodat totu is faulas de parti de Sollai, non scit chi issu o sa giustissia de is ominis at a donai calencula spusta a cussu “poita”. Ma de una cosa est seguru: Una spusta s’assassinu ddat a donai, a innantis o a pustis, a Calencunu. E finas a tandu, dd’at a donai a issu e etotu in dogna noti chi at a passai po pagai sa curpa chi tenit in pissu”.
Màuru Mura
Mercuris, su binticincu de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://mediasetinfinity.mediaset.it/video/pomeriggiocinquenews2024/omicidio-francesca-deidda-chi-lha-uccisa_F313400901036C07
