Totu sa scuadra de su Casteddu s’agatat de s’atra dì in Saint Vincent, in su cumentzu de sa Baddi de Aosta, po aprontai su campionau nou de sa Serie A chi at a partiri su dixiotu de austu, in Casteddu, contras de sa Roma de De Rossi. Eris sa dì de duas de trabbagliu mannu, a pustis seixi dis passadas in Asseminello. Is agiudantis medas de s’allenadori Davidi Nicola ant trabbagliau, massimamenti, in pissu de sa lestresa e sa resistentzia. Totu sa truma at “sunfriu” in campu finas po mori de su caglienti ma totus, chena si chesciai, ant trabbagliau beni e ant lassau su stadiu “Brunod” de Chatillon a pustis is otu.
Oi dus allenamentus po is piciocus, comenti giai si faiat in Asseminello. A is dexi de mengianu sa de unu: a pustis cuasi un’ora de trabbagliu cun sa bocia, is piciocus si ndi funt tiraus is crapitas cun is tachetus po si ponni cussas de cursa. Si cumentzat a sunfriri in campu e a ponni sulidu in is prumonis.
Dapoi a is cincu e mesu si torrat in campu, ma in su mentris at a chistionai cun is giornalistas, in s’atobiu de unu in terra strangia, Pitanu Luperto, chi a pustis airi giogau ocannu passau totu is trintotu partidas de campionau cun s’Empoli, est cussu chi at a pigai su postu de Dossena, chi su Casteddu at bendiu a su Como de Fabregas.
Oi at a lompiri in Saint Vincent su portieri nou Sherri chi at essi, in is pensadas de Nicola, cussu chi s’at a setziri in panchina. In su mentris, propriu chistionendu de portieris, Radunovic, chi est in is disiglius de su Bari, in serie B, at a passai, forsis is urtimas dis in sa Baddi de Aosta cun su Casteddu.
Disigliu mannu po su Casteddu, po ddu fairi torrai, est Gaetano, su giogadori ce su Napoli chi giai ocannu passau fut lompiu in sardigna de su mesi de gennargiu. Su pretziu est artu, prus o mancu noi milionis, ma su diretori Bonato est trabbagliendu po ddu fairi lompiri.
Màuru Mura
Martis, su bintitres de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.lovevda.it/it/banca-dati/2/sport/chatillon/partita-amichevole-cagliari-como/9010208
