Una piciochedda de cuindixi annus chi teniat in conca feti sa stragi de Columbine e a sa cali pragiat a s’inventai paricius nominis e identidadis. Custu est, po s’ora, cussu chi nd’est bessiu a pigliu de sa discienti chi, in Madison, at cumentzau a sparai comenti de una maca bociendu una insegnanti e un’atru discienti a innantis de si bociri issa etotu. Un’atru insegnanti e atrus cincu discientis, de sa matessi scola funt abarraus lantiaus, dus de custus funt postus mali, ce cantu benit fatu sciri.
Sempiri in is scolas de is Stadus Unidus sussedint custus disacatus e custa bia est una piciochedda, Natalie Rupnow, chi si faiat lamai Samantha e, po cantu si scit de calencunu media americanu, fut una personi transgender. Sa politzia non narat né ca eja e nemancu ca nou ma narat, po cantu pertocat sa stragi de Madison ca “non tenit nudda de ita biri cun su ‘genere’ in su cali calencunu s’identificat”.
Poita s’at postu in conca unu sciolloriu de aici po semenai morti e timoria in sa Abundant Life School non si scit ancora nudda, ma in is social est stetia posta una fotografia in sa cali Natalie Rupnow teniat in pissu una magligedda cun su simbulu de una truma tedesca, oguali a-i cussa de Eric Harris, su piciocheddu de dixiot’annus chi paris a su fedali Dylan Klebok iat bociu doxi studentis e unu professori in sa Columbine High School, in su Colorado, candu curriat s’annu de su 1999.
Un’amiratzioni de macus po custus dus piciocheddus chi, a innantis de si bociri a manus insoru, iant fatu una de is stragis prus mannas in dd’una scola in totu is contus americanus. Forsis sa politzia est sighendu su caminu de fairi sa matessi cosa, in prus si ddue agatat finas s’indagu de unu scritu publicau de una personi chi narat de essiri amiga de Rupnow. “Non ce dda eus ancora fata a agatai custa personi, ma ddue seus trabbagliendu”, narat su capu de sa politzia Shon Barnes.
Màuru Mura
Giobia, su dixiannoi de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.newsweek.com/natalie-rupnow-manifesto-police-cannot-find-person-posted-document-2002253
