Cuntierra noa intru de sa presidenti de su Guvernu, Giorgia Meloni, e sa segretaria de su Partidu Democratigu, Elly Schlein, a pustis is fueddus de is dis passadas. Sa presidenti iat nau “sa manca cun su caviali” e sa segretaria iat arrespustu “ca est meglius de sa dresta de s’ogliu de ricinu”.
Immoi sa Schlein est torrada a s’atacu: “Eris a mesudì, – at nau sa segretaria de su Partidu Democratigu in sa trasmissioni ‘L’Aria che tira – dd’apu lamada po ddi pregontai poita est de una cida chi mi ponit in buca fueddus chi no apu mai nau. Mi fait imbucai in manifestadas aunia non soi mai stetia, assessorau regionalis chi no apu mai tentu, e atrus fueddus in pissu de Fitto chi no apu mai umperau. Scit poita no m’at mai arrespustu? Poita, dapoi, depiat andai a Perugia a cicai votus e nendu, duncas, ca non mi arrespundiat. Est issa chi no arrespundit a su telefunu. In prus de m’arrespundiri, iat essi ora de arrespundiri a is italianus in pissu de su dinari liau a sa scola e a sa sanidadi pubrica”. “Mi benit s’errisu – at acabbau Schlein – poita custa cosa acrarat beni meda chini est sa Presidenti de su Consigliu”.
In su fratempus sa Meloni est torrada a chistionai de is atumbus intru de is manifestantis e sa politzia in Bologna e atras citadis italianas, cussus de is dis passadas cun is cartellus “No Meloni” aprontaus de is studentis. “Oi e in is dis Si funt amostadas chistionis chi non si depint amostai. Sa violentzia contras de sa politzia, cun calencunu chi est finas andau a si fairi curai, non si podint biri. A is agentis lantiaus andat totu sa solidariedadi mia e is augurius de sanai coidendu”.
“ Sa spera – at acabbau de nai sa Presidenti de su Consigliu – est chi caelncunu dd’acabbit de protegiri o cicai scusas po cussu chi est sussediu e cundennit chini at amostau violentzia”.
Màuru Mura
Lunis, su dixiotu de Sant’Andria de su 2024
Foto: https://www.avvenire.it/attualita/pagine/schleinpremier-verso-il-confronto-tv
