A pustis is amelessus e is fueddus legius, massimamenti in is social, chi funt lompius a sighiu de airi pediu ses annus de presoni po Mateu Salvini, incurpau de secuestru de personis, a sa publica ministera Giorgia Righi est stetia donada sa scorta. Sa matessi Righi fait parti finas de sa Diretzioni Antimafia e fut sa sola chi ancora giraiat libberta de ominis a ingiriu. Arregodaus ca sa Procura, custus ses annus de cundenna, ddus at pedius po mori ca Salvini, cinc’annus a immoi, candu fut ministru de s’Internu de su guvernu Conte, iat impedius a centucorantaseti intru de mascus e feminas de ndi calai de sa navi Open Arms, fendudeddus abarrai in pissu de sa navi.

In custas oras, in prassa Politeama, s’agatat sa manifestada de sa Lega po amostai solidariedadi a su numuru dus de su Guvernu. E paris a is leghistas militantis si ddue funt amostaus finas is ministrus Giusepi Valditara e Orrobertu Calderoli, in prus de parlamentaris natzionalis e regionalis de sa matessi Lega.

De s’Ungheria funt lompius finas is fueddus de Viktor Orban, su presidenti ungheresu amigu de Salvini: “Seus cun tui, amigu miu! Mateu Salvini minescit una medaglia po airi difendiu s’Europa”, scrit in dd’unu social su presidenti.

“Open Arms – at nau s’abogada de Salvini, Giulia Bongiorno, difendendudeddu – at tentu prus de una ocasioni de ndi fairi calai sa genti chi ddue fut in pissu, ma non ddu at fatu e de su primu finaas a su catodixi de austu de su 2019 at sceberau de passillai in mari, invecias de si nd’andai in sa Natzioni chi teniat in bandela, est a nai sa Spagna”.

“Open Arms – at sighiu sa Buongiorno – non s’est imbatia po casu in sa barca cun is migrantis. Sa beridadi est ca calencunu at donau atrus indicus. Open Arms fut andendu a Lampedusa e invecias, dapoi, at mudau diretzioni e at cumentzau a andai a basciu e a sus. A is otu si registrat un’acostiamentu e a is otu e mesu unu mudamentu de velocidadi. Eita est sussediu?”.

 

 

 

 

Màuru Mura

 

 

 

Cenarba, su dixiotu de mesi de talamini de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.cefablu.it/2024/10/udienza-finale-del-processo-open-arms-salvini-paura-zero-leghisti-in-piazza/6490/