Francia in su disacatu: Emmanuel Macron ponit a un’ala sa pensada de unu guvernu de manca e aici est nieddu su fumu chi ndi bessit de su atobiu de unu po cicai unu presidenti. Su presidenti, postu cun is palas a muru de is deputaus sus, ghiaus de unu Gabriel Attal, sempiri prus foras de s’Eliseo, at postu a una parti sa pensada de unu “premier” postu in contu de sa manca, chi arrigodaus est sa parti chi at bintu s’urtima torrada eletorali.
Sa manca non est po nudda de acordiu, Jean Luc Mélenchon, capu de La France Insoumise narat is matessis cosas chi iat giai nau, est a nai ca su presidenti ci depit stupai, e su comunista Fabien Roussel cumbidat a “una mobilitatzioni popolari in is dis benientis”.
Po Mélenchon, su contu, postu in peis de Macron, est “chena pensamentu”. Macron at bidu ca non si podiat fairi atru e at giai pensau a un’atobiu, in dì de oi, cun atrus partidus e calencuna persona famada. In sa conca de s’Eliseo s’agatant is tramas de su Fronti Popolari Nou, chi at bintu sa torrada eletorali de su 30 de làmpadas e 7 de mesi de orgiolas cun 193 deputaus in s’Assemblée Nationale, ma a tesu meda de sa magiorarantzia de 289 deputaus.
Macron bolit fairi unu guvernu de centru e ponit a un’ala France Insoumise de Melènchon e Rassemblement National de Marine Le Pen cun sa genti de Eric Ciotti.
Bogis a su costau a su presidenti donant s’indicu chi po su capu de s’Eliseo est po mori de cussus chi est totu frimu. A pagu tempus de sa torrada eletorali sa Francia abarrat in dd’una situatzioni chi non si fut mai connota in sa Republica de Cincu, chena unu guvernu e cun positzionis de is partidus frimas.
Macron, in su paperi chi est girau a s’acabbu de s’atobiu, arremonat is arregionis chi ddu ant fatu decidiri: “Unu guvernu sceberau de sa manca iat a tenni, inderetura, 350 deputaus chi iant andai contras e no iat a podiri fairi nudda”.
Màuru Mura
Mercuris su bintotu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Palazzo_dell%27Eliseo
